Ciidamada DFKM ee ku sugan Isgoyska Ex-Koontarool Afgooye oo qabtay walxaha qarxa

Muqdisho:-Wararka naga soo gaaraya Degmada Afgooye ayaa sheegaya in ciidamada DFKM ee ku sugan Isgoyska Ex-Koontarool Afgooye ay gacanta ku dhigeen nin wata walxaha qarxa oo ku sii jeeday magaalada Muqdisho sida uu warbaahinta u sheegay Maxamed Cismaan oo ah taliyaha Ciidanka  Nabad Sugida ee  Ex-Koontarool Afgooye.

Maxamed Cismaan oo ah taliyaha Ciidammada Nabad Sugida ee Ex-Koontarool Afgooye ayaa sheegay in ay qabteen nin watay walxaha qarxa ka dib markii ay baaritaano ku sameeyeen baabuurta BL-ka ee u kala goosha  Isgoyska Ex-Koontarool Afgooye  iyo magaalada Muqdisho.

Sarkaal u hadlay DFKM ayaa sheegay in saacadaha soo socda ay soo bandhigi doonaan wiilka dhalinyarada ah oo ay ku qabteen walxaha qarxa marka ay u dhamaato baaritaanka ay ku hayaan ciidamada DFKM .

Ciidamada DFKM ee ku sugan  Isgoyska Ex-Koontarool Afgooye ayaa isbuucii la soo dhaafay sidoo kale waxay sheegeen in ay gacanta ku dhigeen
wiil iyo gabar dhalinyaro ah oo watay walxaha qarxa kuna sii jeeday magaalada Muqdisho.

A/Cawale
Halgan.net