Ciidanka S/land oo ka baxay degmada Taleex una jihaystay dhinac magaalada Laascaanood

Taleex:-War hordhac ah oo dhawaan soo gaaray warqabadka Halgan.net ayaa sheegay in ciidamo ka tirsan  S/land oo shalay  qabsaday Taleex ay saaka ka baxeen iyagoo u jihaystay dhinac magaalada Laascaanood ee xarunta Gobolka Sool. Wararka ayaa sheegay in socdaan xalay ilaa saaka dhaqdhaqaaq xooggan oo ay wadaan ciidamo ka tirsan Puntland iyo ciidanka Kaatumo oo dhinac ah.

Wararka waxaa ay sheegayaan in Saraakiil ka tirsan S/land kana soo jeeda Gobolka Sool ay la kulmeen odayaasha dhaqan ee Taleex iyagoo si deg deg ah uga baxay magaalada ka dib markii ay dareemeen in shacabku ay diidan yihiin  joogitaanka ciidanka S/land.

Ka bixitaan Ciidanka S/land ayaa waxaa ay ku soo beegmaysaa  ka dib markii Ergaygga gaarka ah ee Qaramadda Midoobay u qaabilsan Arrimaha Soomaaliya, Nikolas Kay  uu codsi u diray Madaxda S/land iyo Puntland in arrinta Sool lagu dhameeyo wada hadal lagana fogaado wax dagaal keeni kara.

Nikolas Kay ayaa yiri “Waxaan ku baaqayaa in la muujiyyo degganaansho,xaaladda laguma xalin karo hab ciidan,Dhamaan dhinacyada ay arrintu qusayso waa in ay muujiyaan dulqaad, kuna kicin ficil keeni karo dagaal ”.Ilaa hadda lam yaqaan sababta ka danbaysay in ciidamo ka tirsan S/land  ay ka baxaan degmada Taleex  saaka xili ay shalay soo galeen balse waxaa la sheegayaa in arrintu tahay arrimo siyaasadeed oo la filayo in maalmaha soo socda ay soo shaac baxaan.

Wixii soo kordha dib ayaan idinkaga soo sheegi doonaa haddiii Alle idmo.

M_M_Deeq
Halgan.net