Saraakiisha Danab oo sheegay in ay dileen 2 Sarkaal oo ka tirsan Kooxda Al-Shabaab.

Ciidamada Kumaandooska Soomaaliya ayaa sheegay in ay dileen Saraakiil ka tirsan Al-shabaab kadib howlgal gaar ah oo ay ka fuliyeen degaanka Buulo Mareer ee Gobolka Shabeellaha Hoose.

Howlgalkan oo ahaa sida ay sheegeen saraakiisha Danab mid qorsheysan mudana laga soo shaqeynayey ayaa waxaa lagu bartilmaameystay sarakaal u qaabilsanaa tababarka kooxda Al-Shabaab oo lagu magacaabo Zubeyr Almuhaajir oo ay kooxda Al-Shabaab horey u xireen .

Zubeyr Almuhaajir ayaa waxaa uu ka qorey kooxda Al-Shabaab kutubo kala duwan oo uu ku dhaliilayey hogaankii hore ee Al-Shabaab Axmed Cabdi Godane .waxaana ka mid ahaa kutubta uu ka qorey.

1-Halkan ka Akhriso Kitaabkii uu ku dalbanayey Abu Zubeyr Muhaajir in la maxkamadeeyo Axmed Godane Amiirkii hore ee Al-Shabaab
Saraakiisha Danab ayaa sidoo kale sheegay in ay dileen sarkaal kale oo lagu magacaabo Macalin Cumar oo la socday Zubeyr Almuhaajir.

Saraakiil ka tirsan ciidanka Kumaandooska Soomaaliya ee Danab ayaa Idaacada Ciidamada Qalabka u xaqiijiyay dhismasha Labada sarkaal.

Ciidamada kumaandooska soomaaliya ee Danab ayaa dhowr mar sheegay in ay dileen saraakiil ka tirsan kooxda Al-Shabaab waxaana ka mid ahaa gudoomiyihii kooxda Al-Shabaab Cali Maxamed Xuseen (Cali Jabal) waxaana dilkiisa xaqiijiyey Al-Shabaab.

Sheegashada saraakiisha Danab in ay dileen labada sarakaal ee ka tirsan Al-Shabaab ee kor ku xusan ma jirto ilo ka madax banaan oo xaqiijinaya

Kooxda Al-Shabaab ayaan wax war ah ka soo saarin in la khaarajiyey labada sarkaal ee Zubeyr Almuhaajir iyo Macalin Cumar .

C/Casiis Maxamed
Halgan.net