Shirka Golaha Wasiirada Galmudug iyo xaaladda amniga deegaanada Galmudug

Garoowe:-Madaxweynaha Dowladda Galmudug, Mudane Axmed Cabdi Kaariye ayaa maanta guddoomiyay Shirka Golaha Wasiirrada Dowladda Galmudug, kaasi oo diiradda lagu saaray xaaladda amniga deegaanada Galmudug, xoojinta nabadgelyada iyo dardargelinta Adeegyada Dowladnimada.

Shirka ayaa warbixin looga dhageystay Wasaardaha Amniga iyo Arrimaha Gudaha Dowladda Galmudug, kuwaasoo ka warbixiyay guud ahaan xaaladda deegaannada Galmudug.

Shirka Golaha Wasiirrada ayaa sidoo kale looga hadlay kooxaha leh aragtiyada gurracan ee isku dayaya in ay qalqal geliyaan amniga iyo xasilloonida deegaannada Galmudug, iyagoo faafinaya Dacaayado raqiis ah iyo warar been abuur ah.

Madaxweyne Axmed Cabdi Kaariye ayaa tilmaamay in Galmudug ay horay uga soo gudubtay hagardaamooyin iyo shirqoollo yoolkoodu ahaa kala qaybinta bulshada Reer Galmudug. Wuxuu xusay in dowladdu ay si buuxda uga warqabto ujeeddooyinka ka dambeeya kooxaha doonaya in ay abuuraan khilaafyo iyo caqabado gacan ku rimis ah, isagoo ku bogaadiyay hay’adaha Dowladda iyo shacabka Galmudug sidey uga feejiganyihiin sharwadayaasha, isaga oo carrabka ku adkeeyay in dowladdu sii xoojin doonto dadaallada lagu ilaalinayo nabadda iyo xasilloonida Galmudug aysan ogolaan doonin gacan kasta ku howlan kala geynta Bulashada.

—–Dhamaad–