Halgan

Maxkamada Ciidamada Militariga Somaliland oo xukun ku riday 22qof(Dhageyso)

editor — Wed, 16 May 2012 23:30:30 +0000

Hargeysa:-Maxkamada Ciidamada Militariga Somaliland ee magaalada hargeisa ayaa maanta Xukuno Dil toogasho iyo Xabsi daayin iskugu jira ku riday 22 qof oo la sheegay inay ka mid ahaayeen dad Shacib hubaysan ah oo shalay Subaxnimadii weerar ku qaaday Xero Ciidan oo ku taala Bariga magaalada Hargeisa .

Weerarkaasi shalay ayay ku dhinteen 7 qof halka ugu yaraan 10 qof oo kalena ku dhaawacmeen hadaba Sahra Ciidle Nuur ayaa goor dhawayd khadka telephone ka kula xidhiidhay Gudoomiyaha Maxkamada Ciidamada Somalilnd Yuusuf Faarax Sharmaarke waxaany ugu horayn waydiisay tirade dadka ay dilka ku xukumeen iyo kuwa xabsi daayinka lagu xukumay

Wareysiga oo maqal ah halkan hoose ka dhageyso

VOA

Madaxweynaha dowlada Puntland oo la kulmay golaha arimaha dibadda ee dalka India(Masawiro)

editor — Wed, 16 May 2012 18:44:24 +0000

India:-Madaxweynaha dowlada Puntland Cabdiraxmaan Maxamed Maxamuud Faroole ayaa maanta waxaa uu kulan la qaatay golaha arimaha dibadda dalka India. Madaxweynaha Puntland ayaa socdaalkiisa waxaa ku weheliya xubno ka tirsan golaha wasiirada Puntland waxayna khudbado kala duwan ka jeedsheen kulankii ay la qaateen golaha arimaha dibadda ee dalka India.

Madaxweynaha Puntland C/raxmaan Maxamed Faroole ayaa si kooban uga hadlay Taariikhda Puntland iyo nabada iyo horumarka ay ku talaabsatay dowladiisa waxaana uu ka hadlay sidoo kale mashaariicda ay dowladiisa wado.

Madaxweynaha Puntland ayaa waxaa uu si kooban uga hadlay dastuurka qabyo qoraalka ee uu buuqa ka dhashay iyo mowqifka dowladiisa iyo ansaxinta qorshaha RoadMapka waxaa uu sidoo kale ka hadlay mushkilada Burcad Badeeda iyo dhibaatada ay ku hayso Caalamka gaar ahaan Puntland isaga oo tacsi u diray dowlada India oo dhowr qof looga afduubay xeebaha Soomaaliya.

Madaxweynaha Puntland Cabdiraxmaan Maxamed Maxamuud Faroole aýaa ugu danbeyntii waxaa uu ka codasay dowlada India in ay taageero dhinac walba ah u fidiso Maamulka Puntland .Madaxweynaha Puntland ayaa kulanka uu la qaatay golaha arimaha dibadda ee dalka India waxaa goobjoog ka ahaa 40 wadan safiiradooda kuwaas oo ku sugan dalka India.

Madaxweynaha Puntland Cabdiraxmaan Maxamed Maxamuud Faroole ayaa waxaa uu si gaar ah ula kulmay safiirada wadamada Democratic Republic of Congo, Turkey, UAE, Algeria, Yemen, Ethiopia, Malawi, Burkina Faso, Benin, iyo Masar.

Hoos ka Akhriso Khudbadii Madaxweynaha Puntland uu jeediyey.

khudbadii faroole

C/Casiis Maxamed
Halgan.net

Dhaqdhaqaaq ciidan oo ka jira degaanka Xayo ee Gobolka Jubada Hoose

editor — Wed, 16 May 2012 11:37:01 +0000

Kismaayo:-Waxaa saaka laga dareemayaa dhaqdhaqaaq ciidan degaanka Qooqaani ee Gobolka Jubada Hoose ka dib markii ciidamo huwan ah oo ka kooban Ciidanka dalka Kenya iyo kuwa Raas kaambooni ay u soo dhaqaaqeen degaanka Xayo oo qiyaastii 20 KM dhinac galbeed kaga beegan degmada Afmadoow. Ciidamadaan huwanta ah ayaa waxaa ay doonayaan in ay weerar ku qaadaan degmada Afmadow oo ay hadda gacanta ku hayaan ururka Al-shabaab difaacyo badan ay dul dhigeen si ay iskaga difaacaan weerarka kaga imaanaya ciidanka huwanta ah oo ay dhowr jeer oo hore ay ku dagaalamaan degaanka Xayo.

Degaanka Xayo ayaa saaka laga dareemayaa xiisad kacsanaan ah iyadoo ciidanka huwantu ay ku soo dhawaadeen, ciidanka Milateriga dalka Kenya ayaa hormuud ka ah qabsashada degaano dhowr ah oo ku yaal gobolka Jubada Hoose oo ka baxay gacan ku haynta Ururka Al-shabaab iyadoo taas loo aanaynayo hubka ay isticmaalayaan ciidanka Kenya oo taageero ka hellaya Midowga Afrika iyo EU.

Dhinac kale ciidanka DFKM iyo kuwa Raaskaambooni ayaa saxaafada u sheegay in ay qabteen sarkaal ka tirsan ururka Al-shabaab ka dib dagaal xooggan oo ka dhacay degaanka Qooqaani walow aysan ilaa hadda si rasmi ah saxaafada ugu soo bandhigin. Sarkaal u hadlay ciidanka huwanta ah ayaa sheegay in sarkaalka laga qabtay ururka Al-shabaab lagu magacaabo Abshir C/laahi uuna ahaa nin u qaabilsan dhinac wacyi gelinta iyo dacwada gobolka Jubada Hoose.

A/cawaale
Halgan.net

Madaxweynaha DFKM Sh.Shariif oo xarunta Qaramada Midoobay saxaafada kula hadley (Daawo Video)

editor — Wed, 16 May 2012 09:51:59 +0000

Waxaa si rasmi ah uga furmay Magaalada New York ee dalka Mareykanka shir gaar ah oo Qaramada midoobay ay uga hadlayeen xaalada dalka Soomaaliya shirkaaas o ay ka qayb galeen Wafdi uu hogaaminayaye Madaxweynaha DFKM Sh Shariif Sh Axmed , Shariif Axmed ayaa waxaa safarkiisa ku weheliyey wasiirka gaashaandhiga ee DFKM Xuseen Carab Ciise. iyo masuuliyiin kale.

Madaxweynaha DFKM Sh Shariif ayaa hadal kooban oo uu saxaafada u jeedieyey waxaa uu kaga hadalay horumarka ay DFKM ay ka gaaratay dhinac amaanka iyo sida ay Hay,addaha Qaramada Midoobay ay taageero ugu bixinayaan DFKM shirarka loo qabtay soomaaliada gaar ahaan kii ka dhacay magaalada London iyo midka hadda loo balan sana yahay in uu ka dhaco dalkja Turkiga.

Hoos ka dhagayso hadalka Madaxweynaha DFKM Sh Shariif Sh Axmed

Source Un.org

Darsigii Dhawaan ka Baxay Halgan web tv Station Sheekh Dr Cali M.Saalax (Daawo ku Celis)

editor — Tue, 15 May 2012 18:04:52 +0000

Oslo:Waxaa akhristayaasha sharafta leh ee Halgan.net u soo gudbinaynaa darsigii dhawaan si Live ah Maqal iyo Muuqaal uga baxay Halgan web tv station darsigaas oo uu Sheekh Dr Cali Maxamed Saalax ka akhriyey Masjidka Towfiiq ee magaalada Oslo ee caasimada dalka Norway, duruusta uu Shiikh Dr.Cali Saalax uu ka akhriyo Masjidka Towfiiq ayaad si toos ah ugala socon kartaan Webka Halgan.net, Dariga maanta ayaa ah darsigii 3aad ee Sheekh Cali uga Hadlay Xaraka Sunuusiya.

Akhristayaasha ayaan u balan qaadaynaa in darsi kasta ee ka baxa Masjidka Towfiiq si Live ahna u baxa aad webka Halgan.net mar labaad isagoo Video ah ay daawan doontaan wax yar ka dib marka darsigu dhamaadohaddii wax cilad dhinac internetka aysan ku imaan masjid ka Towfiiq inagoo adeegsan doona farsamo cusub oo Streamka uu wax walba oo si Live ah u baxa uu Record garayn doono insha Allaahu.

C/Casiis Maxamed
Halgan.net

Ciidamada Booliska dalka Kenya oo lagu qarxiyey Dhadhaab waqooyiga bari Kenya

editor — Tue, 15 May 2012 17:55:18 +0000

Nairobi:-Wararka naga soo gaaraya xeryaha qoxootiga Dhadhaab ee waqooyiga bari ee Kenya ayaa sheegaya in qarax miino lagu weeraray ciidamo Boolis ah ee dalka Kenya kuwaas oo marayey Duleedka Degmada Dhadhaab waxaana qaraxa ku dhintay hal askari halka ay ku dhaawacmeen labo kale.

Taliyaha ciidanka booliiska ee gobolka waqooyi-bari ee dalka Kenya, Leo Nyongesa.oo la hadlay saxaafada ayaa sheegay in miino kuwa dhulka lagu aaso lagu qarxiyey askar waardiye ka haysay gaari ay lahaayeen hay’ad samafal oo ka howlgasha xerada Dhadhaab wuxuuna xaqiijiyey dhimashada hal askari iyo dhaawaca laba kale.

Xerada Qoxootiga ee Dhadhaab ayaa waxaa ku jira qoxooti Soomaaliyeed oo tiradooda lagu qiyaasay 450,000 kuwaas oo ka soo qaxay dagaaladii cuslaa ee ka dhacay Koonfurta dalka Soomaaliya.

Ilaa haatan ma jirto cid sheegatay qaraxa maanta duhurkii lagu weeraray ciidamada Booliska ee dalka Kenya kuwaas oo marayey duleedka xerada Dhadhaab ee waqooyiga bari ee Kenya.

A/Cawale
Halgan.net

Garaad Cadulaahi Cali Ciid talo ayaan ula soo noqonay Puntland (Dhageyso)

editor — Tue, 15 May 2012 17:24:50 +0000

Garoowe:-Garaad Cadulaahi Cali Ciid ayaa markii ugu horeysay ka warbixiyey sababaha ay dib ugu soo laabteen magaalada Garoowe ee xarunta dowlada Puntland Garaadka ayaa sheegay in Dustuurka qabyo qoraalka ee DFKM uusan dhameystirneyn lana aqoon ilaa wakhtiga uu dhamaanayo sidaa darteed ay talo ula soo laabeen madaxda iyo waxgaradka Puntland.

Garaad Cadulaahi Cali Ciid ayaa meesha ka saaray warar ay baahiyeen warbaahinta saaka taas oo ahayd in ay Isimada Puntland ay ka soo caroodeen shirka odayaasha dhaqanka uga socda magaalada Muqdisho kaas oo odayasha dhaqanka Soomaaliya ay ku soo xuli doonaan ergada ansaxin doonta Dastuurka ay yeelan doonto dowlada rasmiga ah ee lagu wado in la dhiso bisha 8aad ee sanadkan 2012 ka.

Hoos ka Dhageyso Wareysiga Garaad Cadulaahi Cali Ciid uu siiyey galabta Idaacada VOA qeybteeda afka Soomaaliga.

M_M Deeq
Halgan.net

Tolow Maxaan isu badali la’nahay W/Q Ustaad C/qaadir Jaamac

editor — Tue, 15 May 2012 16:20:26 +0000

Portland:-Aduunyada aan manta ku noolnahay waxaa ka jira 196 dal (inta xoriyada haysata). Somalida waa dalka kaliya oo aan lahayn dowlad dhexe oo shaqaynaysa laga bilaabo 1991. Marka 195 dal oo isugu jira dowlado Muslim ah, kuwa gaalo ah iyo kuwa cawaan ah oo aan waxba aaminsanayn intaba waxa u suura gashay inay is maamulaan oo dhulkii Illaahay uu ku abuuray oo aabayaashood iyo awooweyaashood ay ku noolaadaan. Hadaba maxay tahay sababta keentay in Somaliya oo iyaga oo dhanba lugu qiyaaso 10 malyuun oo isku dad ah, isku diin ah, isku af ah oo hadana isku dhaqan ah ay ugu heshiin la’yihiin inay is maamulaan oo barwaaqada Alle siiyay wada dhuuqaan. Jawaabta kooban waxay tahay inaan nicmadii Alle nugu manaystay aan celin kari weynay sababtoo ah barwaaqada waxaa lugu ceshadaa mahadnaq Alle taasoo aan gefnay. Ilaa hada ma aanan hilmaamin bishii decembar1990 ayaa Masjidkii Ceel Hindi ee Sh Dahir uu tafsiirka ka akhrin jiray ayuu sheekha ka sheekeeyay in sodonkii sano oo xoriyada aan haysanay aan dambiyo iyo dulmi badan kasbanay taasoo uu sheegay inaan hada mirihii aan beeranay aan goosanayno. Runtii anigu markaas marna ismaoran21sano oo soo socota ayaa mirahaas xun oo noocyo kala duwan ah ayaad ka waraabi doontaan. Kheyr Allaha siiyo Sh Dahir Aw Cabdi iyo culimada lamidka ah ee aragtida dheer oo runtii dhibta dadkooda ku dhacay aan qayb ka noqon. Hadaan tusaale kale isku dayo inaan bixiyo in dhibta na haysata ay tahay wax aan gacmaheena ku kasbanay oo weliba naloo dhaafay in badan;

Magaalada Qaahira dadka ku nool waxaa lugu qiyaasaa 19-20 malyuun oo qof. Dadkaas oo idil hal magaalo ayaa wada qaaday oo ay fuulkooda iyo ceyshkooda Alle ku yaqaanaan, Somalidiina cad iyo caanihii bay calfan waayeen oo Illaahay uga mahad naqi waayeen waxayna ku badaleen inay is dilaan oo ay is dhacaan oo ay is dulmiyaan.

Waxaan maalin meel takhtar ah kula kulmay nin ciraaqi ah markaas ayaan is waraysanay war dalkaagii ka waran iyo dalkaagii ka waran; wuxuu iigu jawaabay inaga Ciraaq waxaan nahay dad aan isku dad ahayn (Carab,Kurdi,Turkumaan) isku diin ahayn(Muslin iyo Kiristan) isku madhab ahayn(Sunno iyo Shiico) sidaas darteed mushkiladeena way adag tahay. Markaas buu i waraystay idinka hadaad Somali tihiin oo intii ummad ku midoobi lahaydba uu Illaahay idinku manaystay maxaa idinka khaldan? Jawaabtaas akhristow adigaan kuu daayay. Illaahay (SW) wuxuu aayada ku leeyahay macnaheeda uu yahay:” Alle ma bedelo xaalad ay Ummad ku sugan tahay ilaa ay iyagu marka hore is bedalaan” oo naftooda wixii xumaa ay wax fiican ku bedelaan.

Ma ka toobad keenay wixii aan galabsanay?

Hadaba inaga Soomaalida ah danbigii iyo dulmigii aan hore u kasbanay oo na dhaxalsiiyay burburka, dowlad la’aanta, iyo magacxumo meel walba oo aan cagta dhignay; ma ku fahamnay inaan Alle u noqono oo qof walba uu naftiisa ka bilaabo oo xumaanta faraha kala baxo towbadna la yimaado. Mise weli waxaan u ciil qabnaa xumaan kale iyo dulmi kale oo isaguna mirihiisa aan wakhtiyada soo socda goosan doono?.

Xagee nalaga soo galay?

Sidaan ognahay nabigeena Maxamed NNKH Allah wuxuu qur’aanka ugu sheegay dagaalkii Uxud ee Muslimku dhibta badan uu soo gaaray; 70 asxaabtii ugu qiimaha badnayd lugu dilay Allaha ka raali noqdee, nabiga NNKH la sigay; in la yiri “NAFTIINA AYAY KA TIMID” lama oran mushrikiinta Carabta ayaa sababay amase Khaalid Ibn Walid ayaa idin dhabar jabiyay. Halkaas waxaan ka fahmi karnaa in dhibaatada nugu dhacday inagu aan qaadayno mas’uuliyadeeda koowaad.

. Arimaha ugu waaweyn oo ummadeena dhibta haysata ku sii fogeeya waxaa ugu horeeya:

1.Warbaahinta intooda badan kuwaasoo ka shaqeeya isku dirka Soomaalida iyo inay boogtii jirtay ay maalin walba sii fagaan; sidoo kale website-yada ciidaas ka badan oo har iyo habeen u taagan oon ka daalayn inay Ummada isku dirkooda ka shaqaynayaan.

2. Qolada lugu tilmaamo “ Aqoon yahano”; waa niman Phd iyo Mastar wada wata laakiin anigu aanan fahmin iyaguna aan filayo inaysan is fahmin. Nimankaan waa kuwa aan isleeyahay qeyb libaax bay ka qaataan inay Soomaalidu sii kala fogaadaan. Sababtu waxay tahay Ummad waxaa badbaadiya dadkooda wax bartay haday yihiin Diin iyo Cilmi aduunba. Balse Soomaalida waxaa lugu ibtileeyay Proffesor raba dantiisa gaarka ah inuu Qabiil ku gaaro markaasay iyagiina dhumeen dadkiina dhumiyeen.

Waxaan aamin sanahay hadii Soomaalida is nacday oo midbakankale uu u arko cadowgiisa qura ay ku badalaan is jecayl iyo walaalnimo inuu geedi socodka nabada ay tahay halkaas meesha uu ka bilaabanayo. Nabigeena Maxamed NNKH wuxuu yimid Madiina Al Munawara iyadoo labadii qabiil ee hore u daganaa Aws iyo Khasraj ay afartan sanno isu laynayeen qabiil; markaasuu wuxuu ku yiri “KA HARA WAA QURMUUNE”. Markaasay waxay heleen sharaf iyo nabad ilaa ay aduunyadoo dhan gaarsiiyeen risaaladii Islaamka.

Maxaa nala gudboon?

Inaadan ka qabqaadan wax kasta oo keenaya dhibaatada na haysata inay nugu sii baahdo ayaa ah adcafu al iimaan ama inta ugu yar oo aad sameyn kartid.

Ma rabo inaan iraahdo maahmaahdii Somaliyeed oo ahayd “Cidna uma maqna ceelna uma qodna” balse waxaan leeyahay Allana waan leenahay oo aan ku kalsoonahay inuu dhibta naga saari doono mar dhow Insha Allah. Laakiin, intaas ka hor waxaan u baahanahay inaan kuligeen Alle u noqono oo towbad dhab ah aan la imaano:

Shardiga towbadu waa afar:

1.Inaad dambigii faraha kala baxdid.

2. Inaad ka qoomameyso.

3. Inaad go’aan ku gaartid inaadan dibdambe ugu noqonayn.

4. Inaad hadii xaq bani aadam uu yahay aad xaqa iska celisid ama ka cafis dalabtid.

Yaa Ugu Munaasibsan Inay Hogaamiyaan Geedi Socodka Nabada?

Culimada ayaa ah dadka looga fadhiyo inay ka shaqeeyaan sidii ummadaan wanaag loo dhexdhigi lahaa. Waxaan aaminsanahay hadii culimada Soomaaliyeed ay howshaan u istaagaan Allana u talo saartaan, kaalmaystaana bulshada qeybaheeda kala duwan sida Odayaasha “Duubabka”,ganacsatada mukhlisiinta ah, dhalinyarada iyo haweenkaba inay Illaahay idankiis mudo yar Ummada kalsooni ku dhex dhigi lahaayeen.

Waxaan aamin sanahay inay Soomaalidu yihiin dad fariid ah awoodna u leh Illaahay idankiis inay is cafiyaan oo xumaanta iyo colaada wanaag iyo is jeceyl ku badali kara.

Gunaanad

Waxaan ugu dambeyntii xusuusin lahaa dadka walaalahay ee Soomaalida ah inay ogaadaan inay jiraan dad inta nakala gaartay ka badan ay kala gaartay oo dagaalo sokeeye uu dhex maray hadana aan isku diin iyo isku madhab midna ahayn hadana ka heshiiyay kadib markay ogaadeen inay waajib tahay inay heshiiyaan; sababtoo ah jiritaankooda ayaa ku xiran arintaa; sida Lubnaan, Ruwanda, Siiralyoon etc.

C/qaadir Jaamac
Portland
Halgan.net

Taliska ciidanka AMISOM oo warsaxaafadeed ka soo saaray sarkaal ay dileen Al-Shabaab

editor — Tue, 15 May 2012 16:19:50 +0000

Muqdisho:-Taliska ciidanka AMISOM ee ku sugan magaalada Muqdisho ayaa maanta warsaxaafadeed ka soo saaray sarkaal ay soo bandhigeen shalay Al-Shabaab kaas oo ay sheegeen in ay dileen talaadadii la soo dhaafay ,Warsaxaafadeedka ayaa waxaa lagu sheegay in Maj. Emannuel Bizimana uu ku dhintay dagaal ka dhacay Degmada Dayniile 20-kii Oktoobar 2011.

Ururka Al-shabaab ayaa shalay soo dhigay Bog ay ku leeyihiin Twitter waxay ku sheegeen inay dileen sarkaalkii hoggaaminayay ciidamada AMISOM kaas oo lagu dilay weerar qorsheysan oo dhacay habeenkii talaadada ee la soo dhaafay taas oo ay diideen ciidamada AMISOM .

Warsaxaafadeedka ka soo baxay maanta taliska ciidanka AMISOM ayaa waxaa u qornaa sidan “Maj. Emannuel Bizimana waxaa la dilay 20-kii Oktoobar 2011, xilligaasoo ay ciidamada Burundi howlgal ka sameynayeen degmada Dayniile,”

Ciidamadamada AMISOM gaar ahaan kuwa dalka Burundi ayaa waxaa looga dilay 76askari dagaalo ka dhacay Degmada Dayniile bishii 10aad ee sanadkii 2011 waxaana laga dhaawacay 110askar oo kale .

Warmurtiyeedka ka soo baxay maanta taliska AMISOM ayaa waxaa sidoo kale lagu sheegay in mid ka mid ah gaadiidka dagaalka uu shalay shil ku galay deegaanka Nuur-Aduunyo ee degmada Dharkeynley wuxuuna dhaliyey shilkaas khasaaro soo gaaray guri ku yaal Degmada Dharkeynley

C/Casiis Maxamed
Halgan.net

Iska horimaada ka dhacay saaka Xaafada New Hargeysa ee magaalada Hargeysa

editor — Tue, 15 May 2012 13:36:06 +0000

Waxaa maanta iska horimaad hubaysan uu ku dhemartay Xaafada New-Hargeysa ee duleedka bari ee magaalada Hargeysa ciidanka Booliska S/lland iyo dad shacab ahaa oo deganaa warashadii Kabista ee ciidankii xooga dalka Soomaliyeed ay ku lahayeen magaalada Hargeysa , iska horimaadka ayaa bilow day ka dib markii ciidanku ay damceen in ay dadka ka raraan taas oo dadku ay kala horyimaadeen shaqaaqo iyo buuq.
Wasiirka Wasaaradda Gaashaan-dhiga Somaliland Axmed Xaaji Cali Cadami, oo uga waramay saxaafada iska hormaad ka dhacay saaka xaafada new Hargeysa ee ku taal duleedka bari ee magaallada Hargeysa ayaa sheegay in iska horimaadka ay ku dhinteen ilaa 3 askari oo ka mid ciidanka S/lland, Wasiirka ayaa xusay in dad shacab ah oo gadoodsan ay rasaas kala horyimaadeen ciidanka Booliska rasaastaas oo dhalisay khasaaro dhan ilaa 7 qof oo dhimasho ah 4 ka mid ah yihiin shacab ah iyo 3 askari oo ka tirsan ciidanka S/lland.

Wasiirka Wasaaradda Gaashaan-dhiga Somaliland Axmed Xaaji Cali Cadami, ayaa xusay in ciidanka S/lland ay hadda ku sugan yihiin goobta dhibku ka dhacay iyagoo dad dhowr ah ay ciidank gacanta ku dhigeen . Dadka ku dhaawacmay shaqaaqada saaka ayaa waxaa loola cararay Isbitaalka weyn ee magaalada Hargeysa iyadoo ciidanka Bololiska magaalada Hargyesa ay ku guulaysteen in ay jooji yaan shaqaaqada dhexmartay iyaga iyo dadkii shacabka ahaa ee deganaa warashadii Kabista ciidankii xooga dalka Soomaliyeed.

M_M_Deeq
Halgan.net