Ciidamada DFKM oo maanta howlgalo ka wada Suuqa Weyn ee Bakaaraha

Muqdisho:-Ciidamada DFKM oo ay la socdaan kuwa Nabadsugida ayaa saaka howlgalo balaaran ka wada gudaha Suuqa Weyn ee Bakaaraha iyaga oo burburin ku wada sandaqado sharci daro uga dhisan wadaayinka ku yaala gudaha Suuqa Bakaaraha .

Howlagalada ayaa saaka waxaa lagu burburiyey Dhismayaal ay DFKM ku sheegtay kuwo sharci daro ah amnigana suuqana wax u dhimaya iyada oo suuqa Bakaaraha uusan lahayn meelaha qaarkood wadooyin waasic ah oo ay gawaarida iyo dadku maraan.

Intii ay wadeen ciidamada DFKM howlgalada lagu burburinayo dhismayaasha ka dhisan hareeraha wadooyinka ayaa waxaa lagu weeraray laba Bam oo kuwa gacanta laga tuuro ah waxaana ku dhintay hal askari iyo haweeney rayid ah ,qaraxa ayaa waxaa uu ka dhacay qeybta Dahabka lagu iibiyo.

Weerarka Bam ka dib ayaa ciidamada DFKM howlgalo ay sameeyeen waxay gacanta ku dhigeen dhowr qof oo looga shakisan yahay in ay Bamka ku tuureen ciidamada DFKM sida uu warbaahinta u sheegay Col. Cali Maxamed oo ka mid ah saraakiisha DFKM.

A/Cawale
Halgan.net