Culimada ina Godane beegsaday Xasaanna fatwooday dilkoodu waa kuwo noocee ah ?

ALLAAH ayaa mahad oo dhammi u sugnaatay .Wakhtigan oo kale oo murugtu aad u badan tahay waxaa dhici karta in sidii aad wax u doonaysay aadan u qori karin , haseyeeshee waxaan isku dayayaa inaan akhristaha la wadaago tilmaan noocee ah buu leeyahay caalimka dilka ku xukumani .

Ka hor inta aanan abbaarin muca qormadan waxaan ka horaysiinayaa labo qodob :

• ALLAAH waxaan u weydiinayaa sheikh cabdul qaadir inuu jannada meel sare ka geeyo  ehelkiisa iyo guud ahaan soomaalina sabir ku arzuqo .
• Waxaa maalin walba sii iftiimaysa khatarta aan yaraysiga lahayn ee ku gadaaman dadkii indhaha u ahaa bulshada oo culimadu ugu horayso .

Intaas ka dib, Caalimka dilka ku xukuman ee la yidhi waa in la dilaa xataa haddii uu xaramkii joogo  sida xassaanba fatwooday wuxuu lee yahay tilmaamahan

• Waa caalim ku baraarugsan khatarta kuwa u xuubsiibtay fikirkii khawaarijta
• Waa caalim aan ka aamusin inuu cadeeyo falalkooda gurracan iyo khatarta ay bulshada ku yihiin
• Waa caalim hadalkiisu saamayn weyn bulshada ku dhex leeyahay
•  Waa caalim aan waxba ka sooqaadin hanjabaadooda iyo caga juglayntooda
•  Waa caalim aan caydooda iyo aflagaadadoodu macno u samaynayn
• Waa caalim ka shaqeeya danta bulshadan silicsan kuna foogan uruurinteeda iyo xallinta mashaakilkeeda
• Waa caalim u arka sixidda fikradaha qalloocani inay tahay waajib ilaahay saaray

Caalimkaasi ma aha :

• Wadaad  xikmad iyo caqli badnaan u arka in aafadan laga aamuso
• Wadaad  usha dhexda ka haysta oo dhibanihii iyo daalimkii isku si u dhaleeceeya
•  Wadaad  aaminsan in dadku wada fitnaysan yihiin isna ay waajib ku tahay inuu fitnadaas ka dheeraado
• Wadaad  u haysta in kooxo gaar ihi is hayaan isaguna aanu midna ka mid ahayn
• Wadaad u haysta in dad gaar ah dhibaatadani haysato oo waliba iyagu wixii ay beereen ay tahay!!
• Wadaad   door biday inuu danihiisa gaarka ah ku ekaado oo gurigiisu deeqo
• Wadaad  dhibta iyo naftii hurnimada neceb oo ku ducaysta ilaaahayoow hareerahayaga
• Wadaad   inaan cidina dhibsan jecel oo wixii qolo ka didaysaba ka fogaada

Akhristoow haddaad taqaan wadaad tilmaamahaas hore leh  ogow inuu liiska madow ku jiro , oo aan loogu tudhayn dadiisa , cilmigiisa,  waxtarkiisa , taariikhdiisa, islaamnimadiisa,  iyo wax allaale iyo wixii lagu badbaadi lahaa oo dhan . Waxaan kusoo gunaanadayaa waxay taariikhdu qori doontaa intii lagu dilay ama lagu wax yeeleeyay ka hortagga fikirkan qalloocan  , waxay taariikhdu ka aamusi doonta intii manta aamusku la qurxoonaaday ama ka afgobaadsaday , waxayna taariikhdu dhaleecayn doontaa intii u qiil bixisay ama taageertay  .

La dhex joogi maayoo arlada dheelmashow qorane

 Qofba wuxuu dhigtaa baa u yaal dhiilka aakhiro e

 Ninkii dhiiri sheegtow is furo waa dhanaan tahaye.

W/Q Sh cabdiraxmaan abyad
Halgan.net , Copenhagen