Al-shabaab oo weerar ku qaaday Saldhiga Ceel-Cadde ee ciidanka AMISOM

Warar ka imaanaya gobolka Gedo ayaa sheegaya in ciidamo ka tirsan Al-shabaab ay saaka subaxii hore ay weerar ku qaadeen Saldhiga ciidanka AMISOM ee dalka Kenya ay ku leeyihiin deegaanka Ceelcade ee Gobolka Gedo. Ciidanka Al-shabaab ayaa saldhiga ku weeraray gaari laga soo buuxiyey walxaha qarxa ka dibna waxaa ay ku qaadeen weerar fool ka fool ah waxaan Saldhiga ka dhacay dagaal xooggan oo markii danbe lagu qasbay ciidanka Kenya in lagala wareego Saldhiga.

Saraakiil u hadlay ciidanka Al-shabaab ayaa sheegay in ay laayeen askar badan oo ka tirsan ciidanka AMISOM gaar ahaan kuwa Kenya ee ku sugnaa Saldhiga Ceel cade ayna kala wareegeen hub iyo saanad kale oo Milateri. Afhayeenka dhinac howlgalka ee Al-shabaab Cabdicasiis Abu Muscab ayaa sheegay in 50 askari in ka badan ay ka dileen ciidanka Kenya ayna ka qabsadeen saldhigii iyo agab kale oo ciidan.

Dhanka kale afhayeenka ciidanka KDF col.David Obonyo ayaa xaqiijiyey weerarka Al-shabaab ay u qaadeen saldhiga ciidanka AMISOM ee Kenya ee deegaanka Ceelcade balse waxaa uu ka gaabsaday in uu sheego khasaaraha la gaarsiiyey ciidanka Kenya

A/cawaale
Halgan.net