Baaq Gurmad Dhibaatada deegaanka Ceel-Cade ee Gobolka Gedo

Ceelcade:-Maamulka Hay’adda, Alrahmah Foundation For Education And Development wuxuu uga baaqaya dhammaan ummadda Soomaaliyeed, ummadda islaamka, iyo hay’adaha gargaarkaba, inay gacan u fidiyaan shacabka Soomaaliyeed ee  ku wax-yeeloobay deegaanka Ceel-Cade, Gedo Soomaaliya. Sida la wada ogsoon yahay dagaalkii meesha ka dhacay wuxuu sababay khasaaro naf iyo maalba leh. Waxaana ku barakay dad badan oo miyiga iyo magaalooyinka daganaa.

Xaaladda hadda iyo wararkii u danbeeyey waa sidan:-

1. Qiyaas 3,000 qoys ka badan ayaa ku barakacay dagaalka.

2. Goobaha dadku ka bara kaceen waxaa ka mid ah: Ceel-cadde, Ceel-guduud, Dag-shariif, Diir-diire, Haramandhera, Likooleey iyo Shiidleey. Deegaanada qaarkood,  loo qaxay markii hore, ayaa haddana laga sii qaxay markay ciidamada Kenyaatigu kusoo dhawaadeen.

3. Isbitaalka magaacalada Ceel-cadde wax adeegyo caafimaad  kama jiraan, oo magaalada waa laga wada qaxay.

4. Adeegyada sida deg-degga ah loogu baahan yahay waxaa kamid ah: Cunto, biyo, teendhooyin  iyo daawooyin.

Dadka duurka uqaxay maalintii waa qorax, habeynkiina waa qabow. Waxay ku sugan yihiin cabsi joogta ah oo diyaaradaa ku dul-meereysanaya, dhulkana, ciidamada Kenyaatiga ayaa ku soo siqaya saacad walba.Haddaba, Hay’adda Alrahmah waxay ku boorinaysa shacabka  iyo mas’uuliyiinta Soomaaliyeed inay gacan ka geystaan badbaadinta iyo ugargaaridda shacabka Ceel-cadde,  iyo inuu qof weliba mas’uuliyadda kaga aaddan howshan ka soo baxo. Waayo  sida Nabiga suubban scw noo sheegey qof waliba waa mas’uul, maalinta aakhirana waa la weydiin mas’uuliyaddaas.

Gudiga Gurmadka Ceel-cade, ee Alrahmah Foundation waxaad kala xariiri kartaa: Sh. C/qaadir Xaashi Cabaas (Xerow) Mogadishu, Soomaaliya+252617122222

Guddoomiyha Hay’adda Alrahmah
Sh. Abdiweli Xarbi Jaamac
Jan/19/2016