Al-Shabaab oo Weerartay Saldhigga Milatari ee Laanta Buur

Wararka ka imanaya Gobalka Shabeellada Hoose ayaa sheegaya in maleeshiyada ururka Al-shabab ay weerar culus xalay ku qaadeen saldhigga miltari ee ciidamada dawladda ay ku lahaayeen Laanta Buur. Weerar kale ayaa la sheegay inay Al-Shabab ku qaadeen saldhigga Shanta Golaha Sare oo u dhow Laanta Buur.

Al-Shabab maleeshiyadooda ayaa wararku sheegayaan inay laba dhinac kasoo weerareen, khasaare culusna uu halkaas ka dhacay.

Ciidanka saldhigga joogay ayaa la sheegay inay ka tirsan yihiin Guutada Shanaad.Wararka ay sheegaya inuu jiro khasaare dhimasho iyo dhaawacba leh. Sidoo kale waxa wararku sheegayaan in baabuur tikniko ah ay u gacan galeen Al-Shabab.

Al-Shabab ayaa la sheegay inay baabuurtaas la aadeen dhinaca magaalada Awdheegle.

Ururka Al-Shabab ayaa sheegay inay hub iyo saanad kale ku qabsadeen weerarka. Al-Shabab waxay kaloo sheegatay inay dishay tobanaan askari laakiin si madaxbannaan looma xaqiijin seegashadaas. Taliye ka tirsan dawladda ayaa beeniyey inay ciidan tiradaas le’eg ka dhinteen. Ilo lagu kalsoon yahay ayaa VOA u sheegay in ilaa haatan la helay maydka lix askari, khasaarahana uu sii kordhi karo.

Wararku waxay intaas ku dareen in ilaa lix baabuurta dagaalka ah ay qabsadeen maleeshiyada Al-Shabab kuwo kalana ay burburiyeen.

VOA Somalia
Halgan.net