Nadwo diini ah oo ka socotay degmada Ufeyn oo la soo gabagabeeyey.[Masawiro]

Ufeyn:-Waxaa lugu soo gabagabeeyay Degmada Ufeyn nadwadii ugu horreysay ee degmada si rasmiya uga dhacda. Cinwaanka nadawada wuxuu ahaa “Toosnaanta” (الإستقامة) waxayna socotay saddex habeen. Waxay nadawadu ka koobnayd 4 muxaadaro iyo su’aalo bulshada loo furay inay culimada weydiiyaan. Canaawiinta nadwada iyo culimada ka qeyb-qaadatay waxay kala ahaayeen sida tan soo socota:-

1- Sh. Axmed Daahir – الإستقامة ووسائل الثبات عليها

2- Sh. C/raxmaan Bukhaari – المعاصي وأثرها في المجتمع

3- Sh. Cismaan Maxamuud Xaaji – المخدرات وأضرارها

4- Sh. Maxamad Macalin Axmed – الربا مفاسده وآثاره

Furitaanka nadwada waxaa ka soo qeybgalay gudoomiyaha degmada Ufayn Cali Jaamac Jibriil, Beeldaaje Cali Faarax iyo culumada nadwada ka qaybgalaysay. Isla habeenkaas waxaa muxaadaradii ugu horreysay ee nadwada soo jeediyay Sh. Axmed Daahir isagoo ka hadlay toosnaanta iyo sida loogu sugnaado.

Habeenkii ku xigay Sh. C/raxmaan Bukhaari ayaa ka hadlay macaasida , dunuubta iyo raadadkooda, isla habeenkaasna waxaa maxaadaro 2aad soo jeediyay Sh. Cismaan Maxamuud dirir oo ka hadlay maandooriyaha iyo dhibaatooyinkiisa. Habeenkii 3aad wuxuu isugu jiray muxaadaro Sh. Maxamad Macalin uu soo jeediyay iyo su’aalo dadweynaha uu uga jawaabayay.

Ugu danbeyntii waxaa lugu soo gunaanaday xaflad ay ka qaybgaleen isimo, odayaal, madaxda degmada iyo gobolka iyo marti sharaf kale oo badan. Xaflada waxaa ka hadlay guddoomiyaha mu’asasada Al-Minhaaj faraca Bari Xasan C/lahi Sh. Xasan, guddoomiye ku xigeenka gobolka Bari Axmed Cirro, wasiirkii hore Yaasiin Cartan, guddomiyaha degmada Ufayn Cali Jaamac Jibriil, Sh. C/Risaaq Xaydari, Beeldaaje Cali Faarax.

Madaxdii halkaas ka hadashay ayaa aad usoo dhaweeyey nadwada ,waxayna aad u codsandeen in lagu soo celceliyo nadwooyinka noocaan ah. Nadwada ayaa kusoo gabagabowday jawi aad u wanaagsan, dadweynuhuna aad ayay uga soo qayb galeen nadwada.

Mu’asassad Minhaaj
Ufeyn, Halgan.net