Guddiga Shuruucda & Caddaaladda Golaha Wakiillada Puntland oo kulmay

Garoowe:-Guddiga Shuruucda & Caddaaladda Golaha Wakiillada Dawladda Puntland ayaa Xarunta Golaha kulan kula qaatay Madaxda Wasaaradda Caddaaladda, Arrimaha Diinta, Dhaqan-celinta Iyo Dastuurka DPL.

Kulanka ayaa waxaa ka qeyb-galay Wasiir ku xigeenka, Wasiiru Dawlaha iyo Ku-simaha Agaasimaha Guud ee Wasaaradda Caddaaladda, Arrimaha Diinta, Dhaqan-celinta Iyo Dastuurka DPL, Waxayna mas’uuliyiinta Wasaaraddu Guddiga uga warbixiyeen wixii u qabsoomay, caqabadaha jira iyo guud ahaan shaqooyinka socda.

Dhinaca kalena, waxa uu Guddigu Wasaaradda la wadaagay warbixin ku aaddan kormeerradii Guddigu ku tagey Gobollada Puntland, gaar ahaan cabashooyinkii ka yimid Maxkamadaha & Maxaabiista ku xiran xabsiyada iyo talooyin ku aaddan nidaamka Xabsiyada iyo Garsoorka dalka Puntland.

DHAMMAAD

Xafiiska Warfaafinta & Wacyi-gelinta,
Golaha Wakiillada Dawladda Puntland