Taliye ku xigeenka qaybta Booliska gobolka Nugaal oo ka warbixiyey howl gal ay xalay ciidanku ku qabteen Khamriilayaal.[Video]

Garoowe:-Taliye ku xigeenka qaybta Booliska gobolka Nugaal ahna ku-simaha taliyaha Gaashaanle Dhexe Maxamuud Muuse Bile ( Fardafuul ) ayaa ka warbixiyey xaaladda amniga ee guud ahaan gobolka iyo howl-gallo amni sugid ah oo Garoowe laga sameeyey.

Taliye ku xigeenka qaybta Booliska gobolka Nugaa ayaa sheegay in xalay ciidanka Booliska Puntland ay hawlgal qorsheysan ku qaaday kooxo Cabtooy ah oo faraha kula jira dambiyo culus oo la xidhiidha ka ganacsiga daroogada oo qeyb wayn ka ahaa falal burcadnimo iyo Amni daro oo mudooyinkii lasoo dhaafay ka jiray magaalo madaxda Puntland ee Garoowe.

Hawlgalka waxaa lagu qabtay saddex ka mid ah burcada Cabtooyda,kuwaas oo labo ka mid ah dhaawacyo soo gaareen iyo hal mid oo nolosha lagu qabtay,hubkoodii iyo Gaadhi ay ku wateen khamri waxayna dhamaantood ahaayeen Dabley hubaysan oo geysta falal amni darro.

Sidoo kale hawlgalku intii uu socday waxay dhaawacyo soo gaareen labo ruux oo midkood yahay Askari katirsan ciidamada booliska iyo Qof rayid ah oo ah Haweenay,waxaana haatan lagu dabiibayaa qaar ka mid ah goobaha caafimaadka.

Saraakiisha Ciidanka Booliska Dowlada Puntland waxay balanqaadayaan dhib kasta oo ka yimaada xoojinta iyo sii socoshada hawlgalka lagu beegsanayo cid kasta oo ku lug leh amni darro iyo Ganacsiga daroogada halista,wuxuuna hawlgalka si xiriir ah habeen iyo maalin uga socon doonaa magaalada Garoowe illaa iyo inta laga gaarayo natiijo wanaagsan.

Ciidanka Booliska iyo cutubyo katirsan ciidamada qalabka sida ee Dowladda Puntland oo si buuxda isaga kaashanaya fulinta hawlaha sugida Amniga,waxaa si gaar ah loogu jeedinayaa bogaadin dhamaan muwaadiniinta ku garabsiinaysa ciidanka la dagaalanka burcada dhibaatada ku haysay xassiloonida ay ku naaloonayaan Dadweynaha ku nool Caasimadda Puntland iyo Guud ahaan Gobolka Nugaal.

M_M_Deeq
Halgan.net