Hoggaamiyaha ku meel gaarka ah oo Baydhabo kulan kula qaatay Guddoomiyaha Guddiga Doorashooyinka DFS.

Baydhabo:-Hoggaamiyaha ku meel gaarka ah ee Dowladda Koonfur Galbeed Mudane Jabriil Cabdirashiid Xaaji ayaa Xarunta Madaxtooyada ku qaabilay wafdi uu hoggaaminayay Guddoomiyaha Guddiga Madaxa-bannaan ee Doorashooyinka iyo Soohdimaha Mudane Cabdikariim Axmed Xasan.

Kulankan ayaa diiradda lagu saaray dardargelinta howlaha doorashooyinka iyo xoojinta wada-shaqeynta ka dhaxeysa Dowladda Koonfur Galbeed iyo Guddiga Madaxa-bannaan. Labada dhinac ayaa isla qaatay muhiimadda ay leedahay in la xaqiijiyo hannaanka doorashooyin hufan oo daahfuran, si loo xoojiyo dimuqraadiyadda iyo dowlad-dhiska.

Hoggaamiyaha ku meel gaarka ah Dowladda Koonfur Galbeed Mudane Jabriil Cabdirashiid Xaaji ayaa bogaadiyay dadaallada Guddiga, wuxuuna caddeeyay in Dowladdu ay ka go’an tahay taageeridda howlaha muhiimka u ah hirgelinta doorashooyin xor iyo xalaal ah.

labada dhinac ayaa ku heshiiyay in la xoojiyo wada-shaqeynta joogtada ah si loo gaaro yoolalka qaran ee la xiriira doorashooyinka iyo maamul wanaagga.

———DHAMMAAD——