Ciidamada DFS iyo kuwa AMISOM oo dhaqdhaqaaq ciidan ka wada gobalka Sh/Dhexe

Balcad:-Wararka naga soo gaaraya Gobalka Shabeelaha Dhexe ayaa sheegaya in ciidamada DFS iyo kuwa AMISOM ay saaka ku soo siqeen oo ay soo gaareen deegaanka Garsaale oo u jirta magaalada Jowhar ee xarunta gobalka Shabeelaha Dhexe  20-km .

Ciidamada DFS iyo kuwa AMISOM ayaa haatan xarun ka sameystay deegaanka Garsaale waxayna ka qoteen dhufeysyo sida uu sheegay sarkaal ka tirsan DFS dhaqdhaqaayada ciidanka ee haatan ka soo kordhay gobalka Sh/Dhexe ayaa waxaa uu qeyb ka yahay howlgalo ay wadaan ciidanka AMISOM iyo kuwa DFS oo doonaya in ay isku fidiyaan dhamaan gobalka Sh/ Dhexe .

Ciidamada ururka Al-Shabaab ayaa iyagana wada dhaqdhaqaaq ay kaga hortagayaan duulaanka ku soo wajahan magaalada Jowhar ee xarunta Shabeelaha Dhexe waxayna dadweynaha ugu baaqeen in ay ka qeybqaataan difaaca magaalada Jowhar.

Ciidamada DFS iyo kuwa AMISOM ayaa dhowr jeer oo hore ka soo laabtay deegaano ka tirsan gobalka Shabeelaha Dhexe . Wadada isku xirta magaalooyinka Muqdisho iyo Jowhar gaar ahaan deegaanka Qalimow ayaa lagu arkay ciidamo ka tirsan DFS iyo kuwa AMISOM oo ku sii qulqulaya.

Ilaa haatan ma jiraan cid ka tirsan Ururka Al-Shabaab oo ka hadlay gulufka colaadeed ee ka soo cusboonaaday gobalka Shabeelaha Dhexe.

A/Cawale
Halgan.net