Ra’iisulwasaaraha DFS Cabdi Faarax Shirdoon oo Kismaayo ku sii jeeda.

Kismaayo:-Wararka naga soo gaaraya magaalada Kismaayo ee xarunta gobalka j/hoose ayaa sheegay in  Ra’iisulwasaaraha Dowlada Federaalka Soomaaliya Cabdi Faarax Shirdoon(Saacid) in uu safar gaaban ku imaan doono  magaalada Kismaayo  maalinta sabtiga ee soo socda .

Wafdi uu hogaaminayo Ra’iisulwasaaraha DFS ayaa waxaa socdaalkiisa ku wehelin doona qaar ka mid ah golihiisa wasiirada iyo saraakiil sare oo ka tirsan ciidanka DFS waxaana uu kulan la qaadan doonaa  maamulka ku meel gaarka ee magaalada Kismaayo ,odayaasha dhaqanka ee gobolada Jubooyinka iyo gudiga gaarka ah ee loo xil saaray in ay soo dhisaan maamul goboleedka Juballand State.

Wafdiga uu horkacayo Ra’iisulwasaaraha Dowlada Federaalka Soomaaliya Cabdi Faarax Shirdoon (Saacid) ayaa waxaa la filayaa in ay soo raaci doonaan xilidhibaano ka soo jeeda goblada Jubooyinka iyo Gedo.

Dhinac kale waxaa maanta si rasmi ah u bilowday shirkii maamul u samaynta  gobolada Jubooyinka iyo Gedo iyadoo dhamaan ergooyinka iyo odayaasha dhaqanku ay ku sugan yihiin xarunta shirka uu ka socdo ee jaamacada magaalada Kismaayo.

Cabdi  Yare
Kismaayo