Maalintii Al-shabaab ay dileen Sheekh Dr. Axmed Xaaji oo 2 ka soo wareegtay

 

Sheekha waxaa maydkiisa la dhigay isbitaalka, ka dibna waxaa janaazadii lagaga tukaday masjidka Rowda salaaddii duhur ka dib.

 

Waxaa sheekha janaazadiisa iyo aaskiisa isugu yimid dad aad u farabadan. Waxaa kale oo kasoo qaybgalay culumo uu hoggaaminayey Sh. C/qaadir Nuur Faarax Alle ha u naxariistee oo si halhaleel ah uga soo ambabaxay magaalada Garoowe markay maqleen dilka Sheekha, Ilaahay mahadiisna si nabadgalyo ah ayay kusoo gaareen magaalada iyo janaazadiiba.

 

Maalintaas waxay reer Boosaaso u ahayd maalin madow oo wixii ka dambeeyey uu isbadalay wajiga iyo dareenka reer Boosaaso iyo guud ahaan bulshaada Soomaaliyeed, ayna u bilaabatay taariikh cusub. 

 

Dadkii faraha badnaa ee janaazada isugu yimid ayuu Sh. C/qaadir u jeediyey hadal qiiro leh oo isugu jiray wacdi, guubaabo iyo caddaynta xaqiiqo dad badani moogaayeen ama ismoogaysiinayeen oo ah in kooxda Al-shabaab ay tahay koox baadiyayasan, ayna dishay Sheekha, isaga oo qabrigii Sheekha dultaagan ayuuna habaaray kooxda Al-shabaab.

 

Sida reer Boosaaso iyo guud ahaan Soomaali taariikh cusub oo wanaagsani ugu bilaabatay ayay Al-shabaabna taariikh madow iyo halaag ugu bilaabatay. Dadkii ogaa xaalkii Al-shabaab ku sugnaa xilligaas iyo sida xaalkoodu uu hadda marayo way u xaqiiqoobaysaa in Rabbi aqbalay ducadii iyo habaarkii Sheekh C/qaadir uu maalintaas qabriga dushiisa ka yiri.

 

Waxaa kale oo yaab lahaa sida degdegta ah ee Rabbi u kashifay kuwii Sheekha dilay iyo wixii xog ahaa ee ay baxsheen oo ku saabsanaa ciddii soo dirtay iyo siday faldambiyeedka u fuliyeen, taas oo runtii tusaysey in Rabbi aqbalay ducadii sheekha iyo ehlu-khayrka oo dhan.

 

Dad badan oo u haystay in dulmiga noocaan ah si dhibyar ku gudbayana waxay ogaadeen in Ilaahay daalimiinta uu usugo laakiin aanu fakin markii uu qabto. Waxa Al-shabaab ku dhacay iyo waxa iyaga ka dhexdhacayna waxay wacdi iyo waano u tahay nin kasta ama koox walba oo dulmi iyo xadgudub isu bahaysata ee Soomaaliyeey Ilaahay aynu ka baqno dhamaanteen oo aynu ka dheeraano daadinta dhiigga muslimiinta iyo isu kaashiga colaadda; si aan Ilaahay inoogu ciqaabin sida uu Al-shabaab dunida guudlkeeda ugu ciqaabay aakhiro ka hor.