Sh Mukhtaar Axmed Faarax oo ka waramay xaalada duufaanta ku dhuftay Puntland

Garoowe:-Xogta laga helaayo gurmadkii ku baxay meelaha roobabkii dabaylaha watay wax yeeleeyeen ayaa ah kuwa aad u kooban, waxaana keenay dhulka oo aysan ka wada shaqayn khadadka telfonada gacanta lagu qaato, markii laga reebo marmar ay meel dheer ama buur la fuulaan telfoonka oo ay halkaas ka soo hadlaan.

Mar uu xalay ka soo hadlay meesha magaceeda loo yaqaan Xoola keen Sh.Mukhtaar Axmed faarax oo watay labo gaari oo waawayn ah ayaa wuxuu noo sheegay arimahaan soo socda:-

1. In uusan weli gaarin meelihii ugu darnaa oo aadka looga dayrinaayey.

2. In uu la kulmay dhul aan ka dhib yarayn aagaga uu usocdo.

3. In degmoooyinka uu ilaa shalay dhex maraayey ay dhibaato wayn ka muuqato isagoo sheegay in ay isugu jiraan dad cayroobay gebi ahaanba iyo dad labo neef u yartay iyo kuwa toban neef u hartay iyo kuwa waxaan dhaamin ay u hartay.

4. Dadku macaluul ayey u dhamaanayaan oo xataa kuwa xoogaa ay u u hareen irmaankii waa ka dhamaadeen waxa haray waa xoolihii gurranaa, raashinna warkiisaba daa.

5. Wuxuu kale u noo sheegay Sheekh Mukhtaar Ahmed Faarax in wixii ay wadeen oo ay ugu talo galeen in ay dadka u qaybiyaan ka dhowdhowdahay sidaas darted si dhaqso ah in xoolo naloola soo gaaro weeye ayuu yiri.

6. Ugu damayntii Sheekh Mukhtaar Ahmed Faarax wuxuu yiri dhibta meeshaan ka dhacday way ka wayntahay sida qofwalba oo aan iman u malaynaayo.

Wuxuuna ku baaqaay Sh.Mukhtaar Ahmed Faarax oo ah Gudoomiyihii hore ee alminhaaj Garoowe in si degdeg ah ummadaan muslimka ah oo dhibaataysan loo soo gaaro wuxuuna sheegay annaga waxayagu dhiig joojin ayey ahayd ee baahidii oo sii laban laamaysa ayaa sideedii u taagan.

Sheekh Mukhtaar Ahmed Faarax
Halgan.net