Shirkii dib u heshiisiinta gobalada Jubooyinka iyo Gedo oo ka socda Muqdisho

Muqdisho:-Shirkii dib u heshiisiinta gobalada Jubooyinka iyo Gedo ayaa maalintii labaad ka socda magaalada Muqdisho  iyadoo maanta la guda galayo loona faahfaahinayo Ergooyinka  heshiiskii Addis Ababa ku dhexmaray DFS iyo Maamulka KMG ee Jubba.

Shirka saaka ka furmay magaalada Muqdisho ayaa waxaa warbixin iyo khudbad ka jeedin doona Wasiiru dowladaha Madaxtooyada Faarax C/qaadir iyo Hogaamiyaha Maamulka KMG ah ee Jubba Sheekh Axmed Maxamed Islaam (Axmed Madoobe ) iyaga oo sharxi doona qodobadii uu ka koobnaa Heshiiskii ay ku gaareen Addis Ababa bishii 8aad labada dhinac.

Shirka ayaa waxaaa Shir gudoominaya Wasiirka Arrimaha Gudaha ee DFS C/kariin Xuseen Guuleed isaga oo dooda u qeybin doona  xubnaha ergooyinka ka qeyb galaya shirka dib u heshiisiinta gobalada Jubooyinka iyo Gedo.

Shirka ayaa waxaa saaka ka dhexmuuqda dhinacyadii ku dagaalamay magaalada Kismaayo ee xarunta gobalka J/hoose waxaana jooga shirka hogaamiyahaMaamulka  Jubba Axmed Madoobe, Iftin Baasto, Cabdi Baalley iyo xubno kale, waxaana shirka ka maqan Barre Hiiraale oo aan isaga wili iman shirka.

Maalinta berito ah ayaa laguwadaa in lasoo gaba-gabeeyay shirka dib u heshiisiinta gobalada Jubooyinka iyo Gedo waxaana soo baxaya cabashooyin kala duwan kuwaas oo ka imanaya qaar ka mid ah beelaha Soomaaliyeed

Shirka dib u heshiisiinta gobalada Jubooyinka iyo Gedo ayaa waxaa maanta lagu magacaabi doonaa 5gudi kuwaas oo ka doodi doona sida nabad waarta looga dhalin lahaa gobalada jubooyinka iyo sidii ciidan qaran looga dhigi lahaa ciidamada maleeshiyaadka ku sugan duleedka magaalada Kismaayo waxaana shirgudoomin doona 5 gudi wasiirka Arrimaha Gudaha iyo Amniga Qaranka C/kariin Xuseen Guuleed.

A/Cawale
Halgan.net