3 dhalinyaro ah oo lagu eedeeyey in ay ka tirsan yihiin Al-shabaab oo Muqdisho lagu toogtay

Muqdisho:-Maxkamadda ciidanka qalabka sidda ee dowladda Federaalka Soomaaliya ayaa saaka waxaa ay xukun  dil ah ku fulisay saddex dhalinyaro ah oo ay ku eedeeyeen in ay ka tirsan yihiin ururka Al-shabaab. Dhalinyarada saaka dilka lagu fuliyey ayaa waxaa ka mid ahaa Xassan Muxiyidiin Xassan oo ahaa ninkii fududeeyey weerarkii ay ururka Al-shabaab ay ku qaadeen Xarunta Villa Soomaaliya lana doonayey in lagu khaarajiyey Ra’iisul wasaaraha Dowladda Federaalka Soomaaliya Cabdiweli Sh Maxamuud.

Waxaa kale oo saaka dhalinyarada la dilay ka mid ahaa 2-bo dhalinyaro ah oo magacooda lagu sheegay Bashiir Xassan Maxamed iyo Aadan Maxamed Xasan oo lagu eedeeyey in ay dilal ka fuliyeen magaalada Muqdisho. Dilka lagu fuliyey seddexdaan dhalinyarad ah ee lagu eedeeyey in ay ka tirsan yihiin amniyaadka ururka Al-shabaab ayaa waxaa uu ka dhacay Barxadda weyn ee School Polizia ee magaalada Muqdisho.

Goobta dilka uu ka dhacayey ayaa waxaa goob joog ka ahaa  Guddoomiyaha sare ee Maxkamadda ciidanka qalabka sidda ee DFS Gaashaanle sare C/raxmaan Maxamed Tuuryare Saraakiil ka tirsan ciidanka Booliska iyo kuwa Nabadsugida ee Dowladda Federaalka Soomaaliya.

A/cawaale
Halgan.net