Madaxweynaha Puntland Prof.Gaas oo si weyn loogu soo dhaweeyey London

London:-Madaxweynaha Dowladda Puntland Prof.C/weli Maxamed Cali Gaas ayaa subaxnimadii Sabtida si diiran loogu soo dhaweeyey Airporka Heathrow ee magaalada London ee caasimada UK.

Madaxweynaha Puntland iyo wafdiga uu hogaaminayo ayaa u tegay London shirweynaha maalgashiga Afrika oo ka furmaya xarunta Britain maalinimada Isniinta ah.

Jaaliyadda Soomaaliyeed oo ay ugu horeeyaan Jaaliyadda Puntland ayaa si weyn uga qeyb qaatay soo dhaweynta Madaxweynaha Puntland oo noqotay tii ugu balaarneyd oo hogaamiye Soomaaliyeed kala kulmo jaaliyadda wadanka UK.

Madaxweyne Gaas ayaa gacan qaaday boqolaal Soomaali ah oo muddo saacado ah ku sugayey Airporka isagoo loo galbiyey Hotelka uu magaalada ka degay.

Prof.Gaas iyo wafdigiisa ayaa inta ay ku sugan yihiin magaalada London lagu wadaa inay la kulmaan Madaxda dowladda UK, waxayna sidoo kale maalinimada Isniinta ah qado sharaf loogu sameeyey Qasriga Boqortooyada, munaasabadaasi oo ah casumaad ay Boqorada UK Queen Elizabeth II oo casuntay hogaamiyayaasha Afrika ee soo gaaray shirweynaha London.

Sidoo kale habeenimada Isniinta ayuu Madaxweynaha Puntland ay ka qeyb geli doonaan casho sharaf ay soo qaban qaabisay Wasaarada arrimaha Gudaha ee UK.

Shirweynaha Maalgashiga Afrika ayaa mid ay kasoo qeyb galayaan shirkadaha waaweyn ee caalamka, waxaana dalalka sida gaarka ah diirada loogu saaray kamid ah dalka Soomaaliya, dowlada Puntland ayaa lagu wadaa inay kusoo bandhigto mashaariicda ay daneenayaan iyo fursadaha maalgashiga ee ka jira deegaanada xasiloon ee Puntland.

no images were found

Farah Yassin Osman
Halgan.net