Madaxweynaha Cusub ee Puntland oo xilka si rasmi ah ula wareegay.[Cod/Masawiro]

Garoowe :-Madaxweynaha Cusub ee dowlada Puntland Dr.C/weli Maxamed Cali Gaas ayaa maanta si rasmi ah ula wareegay xilka hogaanka Puntland waxaana xil wareejinta ay ka dhacday xarunta Madaxtooyada Puntland ee Garoowe.

Munaasabad si weyn loo soo agaasimay ayaa waxaa ay ka dhacday xarunta Madaxtooyada Puntland waxaana ka soo qeyb galay munaasabada xil wareejinta madax ka tirsan Puntland iyo wafdi ka socday QM ,IGAD iyo Midowga Yurub.

Madaxweynihii hore ee Puntland Dr.C/raxmaan Sheekh Maxamed Faroole ayaa sheegay in haddii uu meesha ka baxay inuu yimid mid isaga la mid ah oo howlihii Puntland sii wadi doona wuxuuna sheegay in uu ku faraxsan yahay natiijada doorashadii ka dhacaday Puntland wuxuuna shacabka Puntland ugu baaqay in ay sii wadaan midnimada Puntland ayna ku faro adeygaan Amaanka iyo nabadgalyada.

Madaxweynihii hore ee Puntland Dr.C/raxmaan Faroole ayaa balan qaaday in la shaqeyn doono waxwalba uu awoodana uu la qaban doono madaxweynaha cusub ee Puntland Dr.Cabdiweli Maxamed Cali Gaas oo uu ku sheegay in uu yahay aqoonyahan u qalma in uu hogaamiyo Puntland waxaana uu ka mid ahaa hadalada Madaxweynihii hore Dr.Faroole “Waxan ku faraxsanahay in shacabka  Puntland inay midaysan yihiin waxan kaloo ku faraxsanahay in midnimada Puntland la ilaaliyo Somaalida kalena wixii la awoodo lala qabto,waxan rajaynayaa kuwii ku faraxsanaa inaan meesha ka baxo in mid aniga ila mid ah uu meesha yimi taas ha ogaadaan”.

no images were found

Madaxweynihii hore ee Puntland Dr.C/raxmaan Faroole ayaa ku wareejiyey sidoo kale Madaxweynaha Cusub Mashaariic haatan ka socda Puntland iyo kuwa dhawaan la bilaabayo.

Madaxweynaha Cusub ee dowlada Puntland Dr.Cabdiweli Maxamed Cali Gaas ayaa mahad balaaran u jeediyey Madaxweynihii hore ee Puntland sida sharafta leh oo uu xilka u soo hayey 5sano ee la soo dhaafay iyo sida wanaagsan oo uu xilka ugu wareejiyey waxaana uu balan qaaday in Puntland ay horey u sii socon doonto.

Dhanka kale waxaa saaka aad loo adkeeyey amaanka magaalada Garoowe ee xarunta dowlada Puntland waxaana la arkayey ciidamada daraawiishta oo ilaali xoogan ka haya xarumaha muhiimka ah ee dowlada Puntland.

Khudbadii xil wareejinta ee uu jeediyey Madaxweynihii hore ee Puntland Dr Cabdiraxmaan Faroole hoos ka dhagayso

Khudbadii Madaxweynaha Puntland Dr Cabdiweli Maxamed Cali Gaas uu jeedyey ka dib markii uu xilka la wareegay

M_M Deeq
Halgan.net