Islaan Bashiir Islaan Cabdulle oo ka tacsiyeeyey Geeridii ku timid Allaha u naxariistee Garaad Cabdilaahi Garaad Soofe.

Gaalkacyo:-Islaan Bashiir waxaa uu Ummada Soomaaliyeed uu uga tacsiyeeyay geerida ku timid Allaha u naxariistee Garaad Cabdilaahi Garaad Soofe, oo 19, July, 2014, ku geeriyooday magaalada Buuhoodle ee xarunta gobolka Cayn.

“Innaa lillaahi wa innaa ilayhi raajicuun, waxaan ka tacsiyeynayaa geerida ku timid Allaha u naxariistee Garaad Cabdilaahi Garaad Soofe, oo 19, July, 2014, ku geeriyooday magaalada Buuhoodle, waxaana Ummada Soomaaliyeed leeyahay samir iyo iimaan Allaha naga siiyo, isagana Allihii abuurtay baan Janno uga baryeynaa iyo in uu u dambi dhaafo”. Ayuu yiri Islaan Bashiir.

Islaan Bashiir Islaan Cabdulle Islaan Faarax wuxuu si gaar ah tacsi ugu sii diray qoyskii, ehelkii, qaraabadii iyo asxaabtii uu ka tagay Garaad Cabdilaahi Garaad Soofe oo uu Alle uga baryey in uu samir ka siiyo, Garaadkana wuxuu Alle uga baryay in Alle uu siiyo janatul fardowsa.

Marxuum Garaad Abdullaahi wuxuu ahaa shaqsi Bulshadeena magac ku leh, Hogaamiye dhaqan ah, Nabadda jecel, dadkana wanaaga fara, Dhamaanteen waa ina ka geeriyoodey Allaah ha u naxariisto inagana ha ina ka samir siiyo ku wii ku waana qaatana ha ina ka dhigo.

Ugu dambayntii Islaan Bashiir oo ku sugan hoygiisa Gaalkacyo ayaa umada reer Puntland ugu baaqay in ay is cafiyaan marxuumkana Allaah ugu baryaan in uu dambigiisii dhaafo.

Xafiiska xiriirka Bulshada
Islaan Bashiir Islaan Cabdulle
Gaalkacyo