Madaxweynaha DFS Xasan Sheekh Maxamuud oo gaaray magaalada Beledweyn

Hiiraan:-Madaxweynaha DFS Xasan Sheekh Maxamuud iyo wafdi uu horkacayo ayaa goordhow ka degay garoonka diyaaradaha Ugaas Khaliif ee magaalada Beledweyn waxaana halkaas si weyn ugu soo dhaweeyey mas’uuliyiinta maamulka gobolka Hiiraan saraakiil ka tirsan ciidanka DFS iyo kuwa AMISOM.

Wafdiga Madaxweynaha DFS ayaa waxaa socdalkiisa ku weheliyey wasiir ku-xigeenka wasaarrada arrimaha gudaha Jaamac Maxamed Axmed , taliyaha ciidamada DFS Daahir Aadan Cilmi, taliyaha booliska DFS Jen.C/xakiin Daahir Siciid iyo taliyaha ciidamada nabad-sugida Bashiir Max’ed Jaamac iyo marti sharaf kale.

Madaxweynaha DFS Xasan Sheekh Maxamuud ayaa markii uu gaaray garoonka diyaaradaha Ugaas Khaliif ee magaalada Beledweyn waxaa uu la hadlay warbaahinta waxaana uu sheegay in uu Baladweyne u yimid in uu la kulmo waxgaradaka isaga oo sheegay in uu caawa sii joogi doono magaalada Baladweyne.

Amaanka magaalada Baladweyne ee xarunta gobalka Hiiraan ayaa si weyn loo adkeeyey waxaana meel walba taagan ciidamo ka tirsan DFS iyo kuwa AMISOM.

A/Cawale
Halgan.net