Dagaal ka qarxay Degmada Dhuusa Mareeb ee Xarunta Gobolka Galgaduud

Galgaduud:-Wararka naga soo gaaraya gobalka Galgaduud gaar ahaan Degmada Dhuusa Mareeb ayaa sheegaya in saaka Dagaal u dhaxeeya ciidamo ka tirsan DFS iyo kuwa Ahlusuna ee suufiyada uu ka bilowday degmada Dhuusa Mareeb ee Xarunta Gobolka Galgaduud. Dagaalka ayaa waxaa uu bilaawday markii ciidanka DFS  ay weerar ku qaadeen xerada 26aad halkaas oo ay ku sugnaayeen ciidamo katirsan suufiyada intaas ka dib ayaa waxaa uu dagaalku ku fiday gudaha Degmada Dhuusa Mareeb .

Ilaa iyo hada lama oga qasaaraha rasmiga ee ka dhashay dagaalka ka socda saaka Degmada Dhuusa Mareeb kaas oo daba jooga dagaal shalay ciidanka DFS looga saaray Degmada Guriceel.

Ciidamo ka tirsan kuwa DFS iyo kuwa Ahlu suna ayaa abaabul iyo gurmad wada xili ay cuqaasha iyo nabadoonada gobalka ay wadaan dadaal lagu joojinayo colaad ka jirta Degmada Dhuusa Mareeb iyo Guriceel ee u dhexeysa ciidanka DFS iyo Ahlu suna .

Saraakiil ka tirsan kooxda Ahlu Suna ayaa ku eedeeyey DFS in ay iyada ka danbeyso hurinta colaada ka jirta Degmada Dhuusa Mareeb iyo Guriceel ka dib markii ay soo dirtay wafdi uu hogaaminayo Wasiir kuxigeenka Arrimaha dibada Mahad Maxamed Salaad wafdiga oo wada qorshe Maamul gobaleed loogu sameynayo gobalada dhexe arinkaas oo aysan kooxda Suufiyada ogaleyn.

Dhanka kale Saraakiil ka tirsan DFS ayaa sheegay in dagaalka Ahlu suna ay bilaabeen ayna magaalada ka saareen kooxda Ahlu Suna ayna la wareegeen inta badan Degmada Dhuusa Mareeb . Goobjoogayaal ku sugan Degmada Dhuusa Mareeb ayaa saxaafada u xaqiijiyey in ciidanka DFS ay qabsadeen xerada 26-aad ee ciidamada xoogga dalka Soomaaliya  iyo Koontaroolka Koonfureed ee Degmada Dhuusa Mareeb

A/Cawale
Halgan.net