Suuqyada Islii oo albaabada loo laabay iyo dadka oo dareen ku joog ah

Nairobi:-Suuqyada xaafadda Islii ee magaalada Nairobi, ayaa saaka albaabada loo laabay, iyadoo dadkuna ay dareen ku joog yihiin. Gnacsatada Soomaalida ah ee ka shaqeysta suuqyada waaweyn ee xaafadda Islii, ayaa saaka meheradahooda xiray, ka dib markii uu soo batay dareenka ah in dad Kenyaan ah ay soo weerarayaan, iyadoona dadka loogu baaqay inay is dajiyaan.

Dadka Kenyaanka ah ee ku nool xaafadaha dasirka la ah Soomaalida, ayaa la arkay iyagoo dhalinyaradoodu is abaabulayaan, waxaana xusid mudan in uusan jirin mowqif mid ah oo Soomaalida looga soo horjeedo, balse dad dhalinyaro u badan oo dhac doonaya ayaa xaaladda kicinaya, si ay dadka u baqdin geliyaan, danahoodana u gaaraan.

Xildhibaan Yuusuf Xasan oo laga soo doorto xaafadda Kaamakunji, ayaa sheegay in dadka looga baahan yahay inay is dajiyaan, isla markaasna ammaankooda cidina ayan wax u dhimi karin, isagoona dadka kale ugu baaqay inayan bulsho gaar ah bartilmaameed ka dhiganin, si aan looga dhex faa’iideysanin.

Shalay galab ayey aheyd markii gaari bas ah la qarxiyey, kaasoo ay ku dhinteen 7 qof 30 kalena ku dhaawacmeen, waxaaa markaas dhacday in dad dhalinyaro u badan ay Soomaalidii  ku soo weerareen dhagxaan, waxaana markii dambe soo dhex galay ciidanka Bileyska oo rasaas ku kala eryay.

Halgan.net/Somalireal
Nairobi