Raaf xooggan oo ka socda Xaafada Islii oo ay degan yihiin jaaliyada Soomaaliyeed

Nairobi:-Ciidamada ammaanka ee dalka Kenya, oo aad u tira badan ayaa shalay ilaa maanta howlgallo aad u baaxad weyn ka wada xaafadda Islii ee magaalada Nairobi, halkaasoo dad badan lagu qabqabtay.

Howlgallada, ayaa meel walba ka socda. Ciidanku waxay galayaan guryaha, suuqyada iyo dariiqyada oo ay ciddii ay ka helaan ka qabqabanayaan, waxaana howlgalladaani ay saameyn balaaran ku yeesheen dhammaan dhaqdhaqaaqyadii ganacsiga iyo kii isu socodka ee xaafadda Islii.

Saaka markii waagu baryay ayey soo galeen qaar ka mid ah guryaha xaafadda Islii, waxaana ka mid ah meelaha ay aadka u galeen waddada 8ka, halkaasoo hal guri oo ku yaalla ay ka qabqabteen dad badan oo ay gawaari waaweyn ka buuxsadeen.

Xaafado badan ayaa qeylo dhaantu ka imaaneysaa, iyadoo dadka aan guryaha loogu taginna ay naxdin la darseen, maadaama ay isweydiinayaan xilliga loo imaanayo.

Masaajidda ayaa saameynta howlgallada laga dareemayaa, iyadoo salaadaha subaxa iyo cishaha ay aad u yaraadeen dadka soo aadaya.

Saraakiisha ammaanka ee dalka Kenya, ayaa ku adkeysanaya in howlgalladu sii soconayaan inta laga xaqiijinayo ammaanka, waa sida ay warka u yiraahdeene.

Holwgalladan, ayaa waxaa lagu qabqabtay boqolaal qof oo Soomaali ah, iyadoo xitaa qunsulka Soomaaliya u jooga Kenya la qabtay, walow markii dambe la sii daayay.

Halgan.net/Somalireal