Maamulka iyo Wariyaasha ka howlgala warbaahinta Muqdisho oo soo dhaweeyey qabshada Xasan Xanafi.

Muqdisho:-Kulan ay maanta isigu yimaadeen Agaasimayaasha iyo Wariyaal ka howlgala warbaahinta magaalada Muqdisho ayaa waxaa ay ku soo dhaweeyeen in gacanta DFS uu soo galay Xasan Xanafi Xaaji oo ah Sargaal Shabaab ka tirsan islamarkaana Shabaab u qaabilsanaa dilalka wariyaasha magaalada Muqdisho.

Kulanka ayaa waxaa ugu horeyn ka hadlay Abwaan Cismaan C/laahi Guure oo ah haatan Agaasimaha Radio Kulmiye si weyna loogu xasuusto fagaarayaashii lagu taargeeri jiray Midowgii Maxaakimta Islaamiga oo uu gudoomiye u ahaa Sheekh Shariif Sheekh Axmed madaxweynihii hore ee DKMS.

Abwaan Guure ayaa sheegay in ay si weyn u soo dhaweynayaan qabashada Xasan Xanafi iyo cid walba oo dil u geystay wariyaasha Soomaaliyeed wuxuuna ka codsaday DFS in sharci la marsiiyo Xasan Xanafi.

Sidoo kale waxaa goobta ka hadlay oo soo dhaweeyey qabashada Xasan Xanafi wariyaasha kala ah C/qaadir Maxamed Faarax”Dulyar,C/raxiin Ciise Cadoow oo ah Agaasimaha Radio Muqdisho,wariye Maxamed Ibaarhin Pakistaan iyo qaar ka mid ah ehelada wariyaal uu shirqoolay dilkoodana uu ka danbeeyey Xasan Xanafi.

Dowlada Federaalka Soomaaliya ayaa laamaheeda amaanka waxay shalay soo bandhigeen Xasan Xanafi oo loo heysto edeymo kala duwan oo ay ugu horeyso wariyaal lagu dilay magaalada Muqdisho waxaana ay sheegeen in ay maxkamad horkeeni doonaan.

A/Cawale
Halgan.net