Radio Gaalkacyo oo caawa Bam Gacmeed lagu weeraray iyo laba wariye oo ku dhaawacmay

Gaalkacyo:-Wararka caawa naga soo gaaraya magaalada Gaalkacyo ee xarunta gobalka Mudug ayaa sheegaya in caawa maqribkii Bam Gacmeed lagu tuuray xarunta Idaacada Radio Gaalkacayo.Bamka lagu tuuray Idaacada Radio Galkacayo ayaa waxaa laga soo tuuray dhabarka dambe ee dhismaha waxaa ku dhaawacmay labo ka mid ah wariyaasha Radio Gaalkacyo waxaana ay kala yihiin Shiine Cabdi Axmed iyo Cabdulaahi Maxamuud Aadan.

Dhaawaca labada wariye soo gaarey ayaa ah mid sahlan waxaana la geeyey Isbitaalka guud ee magaalada Gaalkacyo .Radio Gaalkacyo ayaa waxaa dhowr mar u soo hanjabay kooxaha amniyaadka Al-Shabaab kuwaas oo ku dhuumaaleysta magaalada Gaalkacyo.

Magaalada Gaalkacyo dhankeeda waqooyi ayaa waxaa dad ka badan 100 ruux ku dilay kooxaha amniyaadka ee ururka Al-shabaab waxaana ugu danbeeyey dilkii ay magaalada ka geysteen bishii Novembar ee sanadkan iyaga oo ku dilay magaalada Gaalkacyo allaha u naxariistee wariye Cabdirisaaq Cali Cabdi Silver oo ka tirsanaa Radio Daljir iyo TV Horn Cable.

Ciidanka amaanka ee magaalada Gaalkacyo ayaa waxaa howlgalo badan oo ay sameeyeen waxaa ay gacanta ku dhigeen unugyo badan oo ka tirsan kooxda Al-shabaab kuwaas ooo lagu xiray xabsiyada kala duwan ee magaalooyinka Puntland .

M_M Deeq
Halgan.net