Madaxweynaha DFS Xassan Sh Maxamuud oo dib ugu soo laabtay magaalada Muqdisho

Muqdisho:-Madaxweynaha Jamhuriyadda Federaalka Soomaaliya, Mudane Xassan Sheekh.Maxamuud ayaa maanta dib ugu soo laabtey magaalada Muqdisho, kadib markii uu magaalada Cadaado ee gobolka Gal-gaduud kaga soo qeyb galey munaasabadda caleema saarka madaxda maamulka cusub ee KMG ee Gal-Mudug.

Madaxweynaha oo socdaalkiisa ay ku wehliyeen xubno ka tirsan labada gole, ayaa khudbad uu ka jeediyay xafladda caleema saarka diiradda ku saarey sida dowladda ay uga go’an tahay dhaqan gelinta nidaamka xukunka lagu baahinayo, si shacabka ay u helaan adeeg hufan oo baahi dooda daboolaya.

Madaxweyne Xassan Sh.Maxamuud ayaa intaanu ka soo ambabixin Cadaado kula dardaar mey madaxda Gal-Mudug inay ka shaqeeyaan nabadda, isla markaana dowladdu ay diyaar u tahay inay kala shaqeyso xalinta tabashooyinka inta badan ka dhasha dhismaha maamullada. Wafdiga Madaxweynaha waxaa garoonka diyaaradaha ee magaalada Muqdisho ku soo dhoweeyay mas’uuliyiin ka tirsan labada gole.

-DHAMMAAD-
Daud Aweis