Madaxweynaha Puntland oo u hambalyeeyey Madaxweynaha Jubbaland Axmed Maxamed Islaam (Daawo)

Gaalkacyo:-Madaxweynaha Dawladda Puntland Dr.Cabdiweli Maxamed Cali Gaas ayaa gelinkii dambe ee maanta u hambalyeeyey Madaxweynaha Dawladda Jubbaland oo markale ku guulaystay hogaanka maamulkaas.

Shir jaraa’id oo uu warbaahinta qeybaheeda kala duwan Madaxweynuhu ugu qabtay hoygiisa magaalada Gaalkacyo ee xarunta Gobalka Mudug ayaa waxaa ka soo qeyb-galay Wasiiro, Xildhibaano iyo masuuliyiin kale.

Madaxaweyne Gaas ayaa madaxweynaha Jubbaland alle uga baryey in xilka uu markale u qaaday umadda Jubbaland ku guuleeyo, uuna noqdo hogaamiye badbaadiye shacabkiisa.

‘’ Waxaan rabaa anoo ku hadlaya magaca shacabka iyo Dawladda Puntland inaan hambalyo udiro Madaxweynaha Jubbaland Axmed Maxamed Islaam , oo maanta markale Baarlamaanka Jubbaland doorteen ‘’ Ayuu yiri Madaxweyne Gaas.

‘’ Aad iyo aad ayaan ugu hambalyeynayaa guusha u soo hoyatay in haykalkoodi dawladnimo dhamaystirteen oo weliba ay noqdaan xukuumad dhamaystiran shacabka ayaana ugu hambalyeyn ‘’ Ayuu yiri Madaxweynuhu.

Doorashada oo u dhacday si dimuqraadiyad ah ayaa madaxweynuhu ku tilmaamay inay tahay mid ku dayasho mudan, maamulada kale ayuuna ku booriyey in sidaa si lamid ah iyana doorashooyinkooda u qabsadaan, raacana Dastuurka rasmiga ah ee dalka u degsan.

Hoos ka Daawo Madaxweynaha Puntland oo u hambalyeeyey Madaxweynaha Jubbaland Axmed Maxamed Islaam

-DHAMMAAD-

Hoos ka Daawo Dorashadii Madaxweynaha Jubaland oo uu ku guuleystay Axmed Maxamed Islaam (Axmed Madoobe).

Xafiiska Warfaafinta, Wacyigelinta, Hiddaha Iyo Dhaqanka ee Madaxtooyada Puntland.