Madaxweynaha DFS oo qaabiley Danjiraha Netherlands ee Soomaaliya.

Muqdisho:-Madaxweynaha Jamhuuriyadda Federaalka Soomaaliya, Mudane Xassan Sh. Maxamuud ayaa xafiiskiisa ku qaabiley Danjiraha Boqortooyada Netherlands ee arrimaha Soomaaliya Joost Reintjes. Kulankaasi ayaa looga wadahadley xoojinta xiriirka iskaashi ee labada dal.

Madaxweynaha Jamhuuriyadda Federaalka Soomaaliya, Xasan Sheekh Maxamuud ayaa safiirka u sheegay in Soomaaliya ay soo dhoweyneyso barnaamijyada maalgashiga, dib u dhiska iyo kaalmada isugu jirta ee Netherlands dooneyso inay ka fuliso Soomaaliya, kuwaas oo uu sheegay inay waxtar u leeyihiin mustaqbalka Soomaaliyada cusub.

Danjiraha Netherlands, Mr. Reintjes oo isna halkaasi ka hadley ayaa sheegay in dowladdiisa ay wadashaqeyn buuxda la yeelaneyso Soomaaliya, isla markaana kaalin muuqata ka qaadan doonaan mashaariicda kala duwan ee horumarinta iyo kuwo kaleba.

Kulanka oo ku dhammaadey jawi is-afgarad ah ayaa waxaa goob joog ka ahaa Wasiirka Amniga Cabdirisaaq Cumar Maxamed, Wasiirka Batroolka Maxamed Mukhtaar Ibraahim iyo mas’uuliyiin kale oo labada dhinac ka kala socdey.

DHAMMAAD
Daud Aweis
Afhayeenka Madaxtooyada
Jamhuuriyadda Federaalka Soomaaliya