Wasiirka Difaaca Gen Diini “Waxaan xooga saari doonaa dib-u-dhiska Ciidan Qaran oo isku dheeli tiran”

Muqdisho:-Wasiirka Difaaca Xukuumadda Federalka Soomaaliya Gen. C/qaadir Sh.Cali Diini oo ansixinta Xukuumadda kadib, saxaafadda la wadaagay dareenkiisa ku aadan waxa u qorshaysan marka uu xilka la wareego, ayaa uga mahadceliyey xubnaha golaha baarlamaanka codka kalsoonida ee ay siiyeen xukuumadda, isagoo sheegay in uu muhiimadda koowaad siin doono sidii dalku u yeelan lahaa ciidan xoog leh oo hanan kara amniga dalka isla markaana ay u dhameystiran yihiin adeegyadii uu ku howlgeli lahaa.

Wasiirka ayaa sheegay  ilaa iyo hadda ciidamadda Xogga dalka Soomaaliyeed in aysan heysan agabkii loo baahnaa, taasoo ah shay aad muhiim ugu ah sidii loo hubin lahaa ammaanka Soomaaliya ee mustaqbalka fog iyo dhamaystirka xoreynta goobaha wali ay ku harsan yihiin kooxaha Nabad diidka ah.
“Dib u dhiska ciidamada xoogga wax weyn ayaa  ka qabsoomay, inkastoo aan weli la gaarin meeshii la rabay oo ah in ciiidanka dhinac walba laga dhameystiro, sida qalabka, tirada iyo dhaqaalaha” ayuu yiri Gen Diini oo intaas raaciyay.

“Waxaan furi doonaa barnaamijyo lagu dhiirgelinayo bulshada qeybaheeda kala duwan gaar ahaan dhalinyarada aqoonta leh  in ay uga mid noqdaan ciidanka qaranka si loo helo ciidamo hufan oo aqoon iyo karti leh”.

Ugu danbeyn, Wasiirka ayaa sheegay  in wsaaradda difaaca ay qaadan doonto qorshe cad oo lagu hagayo dhisidda  ciidan qaran oo isu dheelitiran iskuna dhafan, lagana soo qoro dhammaan goballada iyo degmooyinka dalka.

—Dhammaad—-