Gudoomiyaha Baarlamaanka DFKM Shariif Xasan Aden oo gaaray magaalada Baydhabo

Baydhabo:-Wafdi uu horkacayo Gudoomiyaha baarlamaanka ee DFKM Shariif Xasan Sheekh Aden ayaa galabta gaaray magaalada Baydhabo ee xarunta gobalka Bay .Gudoomiyaha ayaa waxaa ku soo dhaweeyey garoonka Diyaaradaha ee magaalada Baydhabo maamulka gobalka iyo kan Degmada Baydhabo.

Gudoomiyaha Baarlamaanka DFKM Shariif Xasan ayaa waxaa socdaalkiisa ku weheliya taliyaha ciidanka booliska DFKM Shariif Shiiqunaa Maye, Saraakil ka tirsan ciidanka AMISOM iyo xildhibaano ka tirsan golaha Baarlamaanka DFKM oo ka soo jeeda gobalada Bay iyo Bakool.

Gudoomiyaha Gobolka Bakool Maxamed Macalin Tall iyo ku xigeenkiisa ayaa galabta gaaray Degmada Xudur ee xarunta gobalka Bakool waxaana soo dhaweeyey qaar ka mid ah Maamulka .Bishii Maarso ee la soo dhaafay ayey ahayd markii ay ciidamo ka tirsan dalka Itoobiya oo kaabaya kuwa DFKM ay qabsadeen Degmada Xudur iyo degmooyin kale oo ka tirsan gobalada Bay iyo Bakool.

C/casiis Maxamed
Halgan.net