Tartankii 3aad ee Quraanka kariimka oo ay qabteen Majliska Albayaan ee Koonfur Afrika oo soo gabagaboobay.[Masawiro]

Johannesburg:-Waxaa soo gabagaboobay maanta 28/06/2015 oo ku beegnayd 11/9/1436h, Tartankii saddexaad ee Quraanka kariimka oo ay qabsato jaaliyadda soomaaliyeed ee Koonfur Afrika, kaasoo soo bilaabmay 9/9/1436h kuna beegnayd 26/06/2015.

Tartankan waxaa soo qaban qaabisa sannad walba Majliska Albayaan al Islaami ee Koonfur Afrika, ayadoo ay ka soo qayb galaan madaarista soomaaliyeed iyo walaalaha muslimka oromada madaaris tooda ee ka jira waddankan. Sannadkan waxaa ka soo qayb galay 38 arday oo ka kala socday 11 madaraso quraan.

Waxaa lagu tartamayay 30 ka Jus, 20ka Jus, 10ka Jus, 5ta Jus iyo 1ka Jus,  run ahaantii caruurtii ka qayb gashay tartankan waxay muujiyeen wacdaro aad u yaab badan, halkaas waxaa ka muuqday dadaalka ay macalimiinta iyo waalidkuba bixinayeen, ayadoo ay dadkani ku nool yihiin waddan qurba ah, isla mar ahaantaana muslimku uu ku yahay aqaliyo.

Tartanka waxaa soo baxayay qolo walba saddex qof ee ugu buundo badan, halkaasoo ay guushii ku raacday 15 arday ka mid ah 38 dii ku tartamaysay goobta, horraa loo yidhi, gari laba nin kama wada qosliso.

Waxaa ku guulaysatay gabadh ka socotay madarasada Ubaya Ibnu kacab ee Markazka Al-Huddaa ee magaalada Rutenburg.  Waxaan Alle ooga baryaynaa in caruurtaa, waalidkooda, iyo macalimiintii ku soo dadaashayba uu miisaanka xasanaadkooda ugu daro maaalin ay uga baahi badan yihiin.

Waxaan mahad oo dhan u celinaynaa Alle oo inoo suuro galiyay qabsoomidda iyo dhamaanshaba.

Waxaan kale oon u mahad celinaynaa cid walba oo ka qayb qaadatay qabsoomidda tartankaan Alle ayaana idiin abaal gudi kara, waxaanse idin leenahay Jasaakumullaahu khayran.

no images were found