Madasha 6-aad ee Heerka Sare ee Soomaaliya iyo beesha caalamka oo maanta ka furmey magaalada Istanbul.[Masawiro]

Istanbul:-Madaxweynaha Jamhuuriyadda Federaalka Soomaaliya, Mudane Xassan Sh.Maxamuud iyo Ku- Xigeenka Xoghayaha Guud ee Qaramada Midoobay, Jan Eliasson ayaa maanta shir guddoomiyey Madasha 6-aad ee Heerka Sare ee Soomaaliya iyo waddamada/hay’adaha iskaashiga la leh ee dhinaca dib u dhiska Soomaaliya (High Level Partnership Forum).

Shirka waxaa si rasmi ah u furey Madaxweynaha Jamhuuriyadda Turkiga Recep Tayyip Erdoğan, waxaana ka qeybgalay in ka badan 200 oo ergo oo ka socda in ka badan 50 dal, hay’adaha caalamiga iyo hay’adaha Qaramada Midoobay.

Shirka oo socon doona muddo laba maalmood ah, ayaa waxaa qiimeyn iyo dib u eegis lagu sameyn doonaa horumarka laga sameeyay Barnaamijka Cahdiga Cusub ee Soomaaliya (the Somali Compact), kaas oo markii ugu horeysey lagu ansixiyey magaalada Brussels bishii September sannadkii 2013.

Madaxdii ka hadashey shirka ayaa soo dhoweeyay horumarka dhinaca siyaasadda iyo amniga ee Soomaaliya ay ku tallaabsatey, iyo balanqaad ah inay sii wadayaan taageerada la siinayo Soomaaliya.

Daud Aweis
Afhayeenka Madaxtooyada
Jamhuuriyadda Federaalka Soomaaliya