Dagaal dhexmaray Galmudug iyo Maleeshiyaad Isbaaro dhigtay Koonfurta Gaalkacyo

Gaalkacyo:-Wararka naga soo gaaraya magaalada Gaalkacyo ee xarunta gobalka Bari ayaa sheegaya in iska horimaad culus uu dhexmaray ciidamo daacad u ah Maamul Galmudug iyo Maleeshiyo beeleed isbaaro dhigatay Koonfurta magaalada Gaalkacyo.

Dagaalka ayaa waxaa qaaday ciidamada Galmudug ka dib markii ay diideen Maleeshiyaadka Isbaarada dhigtay in ay qaadaan Isbaarada waxaana halkaas ka dhacay dagaal la isku adeegsaday hubka culus iyo ka fudud waxaana ciidanka Galmudug ay la wareegeen halkii ay isbaarada dhigteen maleeshiyada.

Ilaa inta la ogyahay waxaa iska horimaadka ku dhintay 4 qof oo ka tirsan Maleeshiyada Isbaarada dhigatay waxaana jira dhaawacyo soo gaaray ciidamada Galmudug kuwaas oo la geeyey Isbitaalka Koonfurta magaalada Gaalkacyo.

Maleeshiyada ayaa Isbaaro dhigtay deegaanka Ceel-Akhwaan oo ku dhaw magaalada Gaalkacyo, iyadoo wararku qaar ay sheegayaan in ay xiisad ka jirto deegaanka Ceel-Akhwaan oo ah halka lagu dagaalamay.

Saraakiisha Maamulka Galmudug ayaan ilaa haatan ka bixin wax faahfaahin ah iska horimaadka ka dhacay deegaanka Ceel-Akhwaan 10 KM dhanka Koofur ka xiga Magaalada Gaalkacyo ee Xarunta Gobolka Mudug.

A/Cawale
Halgan.net