Faahfaahin ka soo baxday dilkii Wariye Mahad Salaad oo shalay lagu dilay Beledweyne

Hiiraan:-Waxaa shalay galabta lagu dilay magalada Beledweyne ee xarunta Gobolka Hiiraan wiil dhalinyaro ah oo lagu magacaabo Mahad Salaad Aadan oo wariye u ahaa Idaacada Shabeelle ee ka howl gasha magaalada Muqdisho ee caasimada dalka Soomaaliya , Allaha u naxariistee Wariye Mahad Salaad  ayaa waxaa la dilay xili uu ku sugnaa meel u dhow gurigii uu degaan oo yaal Xaafada Howl Wadaag.

Nin dhalinyaro ah oo ku hubeysan Bistool oo ku sugayey meel u dhow gurigii uu degaan Wariye Mahad Salaad ayaa dhowr xabadood ku dhuftay Wariye Mahad taas oo markii danbe uu u geeriyooday ,  Dadweyne ku dhawaa goobta dilka ka dhacay ayaa waxaa ay ciidamo ka tirsan Maamulka Gobolka Hiiraa u tilmaameen goobta uu u baxay ninka dilka geystay taas oo sababtay in ninka dhalinyarada ah ee dilka fuliyey ay dagaalmaan ciidanka ilaa uu ka dhinto.

Afhayeenka Maamulka Gobolka Hiiraan Maxamed Nuur Dabaashe Cagajoof oo xalay kula hadlay saxaafada magaalada Beled weyne ayaa sheegay in ciidanka maamulka Beledweyne ay isku dayeen in ay nolosha ku qabtaan nin dhalinyaro ah ee dilay wariye Mahad Salaad ka dibna uu ninkaas dagaalamay ilaa la dilo.

Afhayeenka Maamulka Gobolka Hiiraan Maxamed Nuur Dabaashe ayaa ku eedeyey in dilka Wariye Mahad Salaad Aadan ay ka danbeeyaan ciidanka ururka Al-shabaab isagoo sheegay in ciidankiisu ay ka hortegi doonaa cid walba oo doonaysa in ay dilaan wariyaasha iyo cid weliba oo ku nool magaalada Beledweyne.

A/cawaale
Halgan.net