Ciidamada booliska ee magaalada Gaalkacyo oo xabsiga dhigay 50 qof

Gaalkacyo:-Ciidamada booliska ee magaalada Gaalkacyo ayaa xalay howlgalo ka sameeyey xaafadaha waqooyiga magaalada Gaalkacyo ee xarunta gobalka Mudug waxaana howlgaladaas ay ku soo qabteen dad badan .

Taliyaha qeybta booliska gobolka Mudug G/sare  Jaamac Maxamed Axmed ayaa warbaahinta u sheegay in ay howlgalada ku soo qabteen dad ka badan ilaa 50 qof kuwaas oo looga shakisan yahay in ay ku lug leeyihiin falal lid ku ah amaanka magaalada Gaalkacyo.

Howlgalada ay xalay ka sameeyeen ciidamada amaanka ee magaalada Gaalkacyo ayaa ku soo beegmaya xili shalay qarax is miidaamin ah lagu weeraray taliye ku xigeenka ciidanka Booliska ee Puntland Jen Muxyaddiin Axmed Muuse waxaana qaraxa uu dhaawac ka soo gaaray taliyaha iyo qaar ka mid ah ilaaladiisa.

Dadweynaha ku dhaqan magaalada Gaalkacyo ayaa ka cabanaya ciidamada amaanka in marka ay howlgal fulinayaan aysan kala soocin xubnaha ka tirsan Ururka Al-Shabaab iyo dhalinyarada kale ee magaalada ku sugan .

M_M Deeq
Halgan.net