Madaxweynaha Puntland iyo Waftigii uu hoggaaminayey oo loogu soo dhoweeyey Jabauuti

Madaxweynaha Dawladda Puntland Dr. Cabdiweli Maxamed Cali Gaas iyo wafti uu hoggaaminayo ayaa maanta 07-May-2016 gaarey magaalada Jabuuti ee xarunta dalka Jabuuti, halkaas oo si aad u diirran loogu dhoweeyey Madaxweynaha iyo wafdigiisaba.

Wafdiga Madaxweynaha oo ay kamid ahaayeen Marwada koowaad ee Puntland Dr’s Hodon Siciid Ciise, Wasiirka Maaliyadda dawladda Puntland Cabdullaahi Sheekh Axmed, Wasiirka Amniga dawladda Puntland Cabdi Xirsi Cali Qarjab, Xildhibaano iyo saraakiil ka tirsan Madaxtooyada dawladda Puntland ayaa waxaa garoonka diyaaradaha ee magaalada  Jabuuti kusoo dhoweeyey masuuliyiin sare oo ka tirsan dawladda Jabuuti oo uu hoggaaminayey Agaasimaha guud ee Madaxtooyada dalka Jabuuti Ismaaciil Xuseen Taani.

Salaan iyo soo dhoweyn kaddib Madaxweynaha iyo waftigii waxaa loosoo gudbiyey qaybta nasashada ee martida gaarka ah ee garoonka Jabuuti, halkaas oo ay cabbaar ku nasteen, iyadoona ugu dambayntii loo sii gudbiyey hoygii  loo diyaariyey ee ay ku degi lahaayeen.

Madaxweynaha dawladda Puntland Dr. Cabdiweli Maxamed Cali Gaas ayaa ka maalinimada berrito magaaalada Jabuuti kaga qayb geli doona munaasabadda caleemo saarka Madaxweynaha Jamhuuriyadda Jabuuti Islmaaciil Cumar Geelle oo markii afraad ku guuleystey jagada Madaxtinimada dalkaasi.

no images were found

Sidoo kale Madaxweynaha dawladda Puntland Dr. Cabdiweli Maxamed Cali Gaas ayaa inta uu joogo magaalada Jabuuti waxaa uu kulamo kala duwan la qaadan doonaa Madaxda ugu sarraysa dalkaasi iyo xubno isugu jira Safaaradaha iyo hay’adaha fadhigoodu yahay dalka Jabuuti.

—DHAMMAAD—

XAFIISKA WARFAAFINTA, WACYIGELINTA, HIDDAHA IYO DHAQANKA EE MADAXTOOYADA DAWLADDA PUNTLAND.