Machadka Dr.Axmed Xaaji oo ay maanta ka qalin jabiyeen 150-arday .

Garoowe:-Machadka hormarinta arrimaha bulshada ee Dr.Axmed Xaji C/raxmaan ayaa waxaa maanta ka qalin jabiyey 150 arday oo baranayey hormarinta arrimaha bulshada iyo cilmiga Sayniska waxaana xaflad balaaran loogu qabatay ardayda hoolka shirarka Jaamacadda Barifa Africa ee magaalada Garoowe.

Xaflada Qalinjabinta ayaa waxaa ka soo qeybgalay masuuliin ka tirsan dowlada Puntland ,Maamulka Machadka, Macalimiin iyo dhamaan ardayda wax ku barata Machadka Dr.Axmed Xaji C/raxmaan raximahulaah .Ugu horeyn ayaa munaasabada xaflada waxaa furay oo ka hadlay Mamulaha machadka Dr.Axmed Axmed Diiriye waxaana uu u mahad celiyey dhamaan martida ka soo qeyb gashay xaflada isaga oo hambalyo u diray dhamaan ardaydii ka qalinjabisay machadka Dr Ahmed .

Maamulaha Machadka Dr Ahmed ayaa ku dhiiro galiyey dhamaan ardayda in ay waxbartaan kana faa,ideysaan wakhtigood si ay naftoodana wax u taraan umadana wax ugu qabtaan.Qaar ka mid ardaydkii ka qalin jabisay Machadka Dr.Axmed Xaaji C/raxmaan oo ka hadlay xaflada qalinjabinta ayaa shegay in ay aad ugu faraxsan yihiin shahaadooyinka ay qaateen iyo aqoontii ay ka barteen machadka Dr.Ahmed Xaji .

Dhanka dowladda Puntland ayaa waxaa xaflada ka hadlay Wasiiru dowlaha maamul wanaaga Puntland Maxamed Faarax Ciise Gaashaan waxaana uu mahad balaaran u celiyey maamulka Machadka ,macalimiinta waxaana uu si gaar ah ula dar-daarmay ardaydii ka qalin jabisay Machadka Dr Ahmed Xaaji raximahulaah in ay aqoontooda umada wax ugu taraan .

Ugu danbeytii ayaa Wasiiru dowlaha maamul wanaaga Puntland Maxamed Faarax Ciise Gaashaan waxaa uu gudoon siiyey shahaadooyinkii 150 arday ee ka qalinjabisay Machadka Dr Ahmed Xaji raximahulaah oo ay shabaab ku dileen magaalada Boosaaso ee xarunta gobalka Bari.

M_M Deeq
Halgan.net