Maxkamada G/Banaadir oo xukun ku riday Milkiilaha Idaacada Shabelle, iyo Wariye Maxamed Bashiir

Muqdisho:-Maxkamada Gobolka Banaadir ayaa maanta xukun kala duwan ku riday Milkiilaha Idaacada Shabelle Cabdi Maalik Yuusuf Maxamuud , Wariye Maxamed Bashiir Xaashi iyo Faadumo C/qaadir Xasan oo ahayd gabashii sheegtay in ay kufsadeen wariyaal u shaqeeya Radio Muqdisho.

Milkiilaha Idaacada Shabelle Cabdi Maalik Yuusuf Maxamuud ayaa waxaa lagu eedeeyey yo in uu aflagaado ka dhan ah madaxda qaranka, ku faafiyey Idaacada Shabelle iyo Mareegta idaacada waxaana uu aflagaado gaar ah u geystay Wasiirka Arrimaha Gudaha iyo Amniga Qaranka C/kariin Xuseen Guuleed waxaana lagu xukumay halsano xarig ah.

Maxkamada ayaa waxaa kale oo ay xukun ku riday Faadumo C/qaadir ka dib markii Maxkamada ay soo bandhigtay cadeymo ay ku sheegtay in ay been tahay in la kufsaday Faadumo C/qaadir Xasan waxaana lagu xukumay 6 bilood oo xabsi ah oo dibad joog ah.

Maxkamada Gobolka Banaadir ayaa waxaa kale oo xabsi 6 bil ah ku xukuntay Wariye Maxamed Bashiir Xaashi waxaana lagu eedeeyey in uu been abuur faafiyey warbaahinta .

Gudoomiyaha Maxkamada gobolka Banaadir Xaashi Cilmi Nuur ayaa sheegay in xukunka Maxakamada Gobalka Banaadir racfaan laga qaadan karo xukunka ama la iibsan karo.

A/Cawale
Halgan.net