R/W Saacid Go,aan kasta oo Baarlamaanka gaaro anigoo ka maqan waa mid malo awaal ah .

Muqdisho:-Raisulwasaraha DFS Cabdi Faarax Shirdoon Saacid ayaa maanta markii ugu horeysay ka hadlay Mooshinka ka dhanka ah xukuumadiisa waxaana uu ku baaqay in la siiyo fursad ay xukuumadiisa isku difaacdo.

Raisulwasaaraha DFS Cabdi Faarax Shirdoon Saacid ayaa sidoo kale ka hadlay mooshinka laga keenay xukuumadiisa wuxuuna ku tilmaamay  mid ay ka maqan tahay xog-ogaalnimo rasmi ah wuxuuna sheegay wixii go,aan ah ee ka soo baxa Baarlamaanka DFS in uu yahay mid mala awaal ah.

Hoos Ka Akhriso Warsaxaafadeedka ka soo baxay Xafiiska Raisulwasaaraha DFS Cabdi Faarax Shirdoon Saacid.

Ra’iisul wasaare Saacid: “Xukuumaddu waxay ku adkaysanaysaa in la siiyo fursad ay isku Difaacdo”
Eedaymaha mooshinka ku xusan ee lagu dhudhuminayo kalsoonida xukuumadda, ma aha kuwo xaqiiqda dhabtaa ku salaysan. Waxaa maqan xog-ogaalnimo rasmi ah.

Hadaba, si waafaqsan cadaaladda dabiicigaa (Natural Justice) iyo shuruucda dalkaba – waxaa xukuumaddu diyaarisay qoraal waafi ah ee ay uga jawaabayso dhamaan eedaymaha loo soo jeediyay, oo keeni kara qaneecaad iyo kalsooni dhisid buuxda.

Sidaas la’adligeed, ‘xukuumad ahaan’, waxaan golaha baarlamaanka ee sharafta leh mar labaad ka codsanaynaa in naloo ogolaado fursad nalagu dhagaysto si aan isaga difaacno eedaymaha naloo soo jeediyay. Go’aan kasta oo la gaaro anagoo maqan waa mid ku dhisan malo awaal.

Dhamaad-