Shirkii 3aad ee raabidada culimada Muslimiinta galinkii danbe ee maanta (Warbixin)

Istanbul:-Kulan raabadida culimada muslimiinta ayaa galabta waxaa lagu qaadaa dhigay qaar ka mid ah muqaallada halista ah ee muslimiinta haysta, wareeggii hore waxaa laga hadlay kacdoonnada ka soo horjeeda kacaanka shucuubta dowladihii kacdoonnadu ka dhecee, Qoraalka 1aad waxaa soo gudbiyay Sheekh Maxamad Yusri oo ka mid ah  culimada waaweyn ee dalka Masar, wuxuuna si faahfaahsan uga hadlay inqilaaabkii ka dhacay Masar ee lagu riday madaxweyne Maxamad Mursi, wuxuu ka hadlay asbaabta keentay inqilaabka, aaladaha loo adeegsaday iyo natiijada lafili karo inuu ku dhamman doono, gabagabadiina wuxuu sheegay in sida wax u socdaan ay muujineyso in inqilaabku fashilmi doono.

Kadibna waxaa qoraala soo bandhigay Sheekh Cabdul Wahaab Al-Xumeyqaani oo ka mid ah culimada Yemen, wuxuuna si fiican uga hadlay kacdoonkii Yemen iyo heshiiskii ay dowladaha khaliijku soo bandhigeen , wuxuuna sheegay in xaaladda daganaasho ee Yeman ay halis badan ku jirto, Sheekha ayaa tibaaxay  in fara galint shisheeye iyo dagaalka xuutiyiintu ay kuwii soo  murginaya xaaladda dalka Yemen.

Wareeggii 2aadna waxaa la falanqeeyay islamiyuuntu sida ay uga howl galeen waddamada kacdoonnadu ka dheceen, warqaddii 1ad waxaa soo jeediyay Sheekh Maxamad Al-Cabdah oo ka mid ah culimada Suuriya wuxuuna si faahfaahsan uga hadlay kooxaha suuriya ka jihaada ee ku midoobay jabhadda islaamiga ah wuxuuna sheegay inay aheyd tallaabo muhiim ah guulo badanna soo hoysay .

Qoraalka 2aad waxaa soo qaddimay Dr. Khaalid Saqar oo ka mid ah culimada Masar, wuxuuna qiimayn fiican ka bixiyay , qaabka ay wax u maareeyeen islaamiyiintu kacdoonkii Masar ka dib, wuxuu ka hadlay Jamaacada Al-ikhwaan Al-Muslimuun , iyo qaybaha salafiyiinta wuxuuna sheegay in wax badan la khalday wax badan oo wanagsanna la qabtay.

Sheekh Maxamad Al-caamiri ayaa warqaddii 3aad soo gudbiyay wuxuuna ka hadlay sida ay islamiyiintu Yemen wax u maareeyeen wuxuu ka hadlay xisbiga islaax iyo xisbiga rashaad wuxuuna tilmaamay murugga siyaasadeed ee ka jira Yemen  iyo siyaabaha loo Furdaamin karo wax ka mid ah.