Maxkamadda militariga oo xukun ku riday sarkaal ka tirsan Daacish

Muqdisho:-Maxkamadda militariga Soomaaliya ayaa xukun xabsi ah ku riday xubin lagu helay inuu ka tirsan yahay ururka Daacish.

Warsame Cabdi Xasan ayey Maxmakadda Milatarigu ku xukuntay 15 sano oo xarig ah kadib markii ay ku heshay inuu argagax geliyey ganacsatada, isagoo ka doonayey baad uu u ururinayey kooxda Daacish.

Warsame ayaa bishii October ee sannadkii hore lagu qabtay magaalada Muqdisho.

Waxaa maxkamaddu soo bandhigtay muuqaal la sheegay inuu tusinayo Warsame oo rasaas ku furaya dad ku sugan goob ganacsi.

Ninkaasi ayaa intii uusan ku biirin Daacish la sheegay inuu ahaan jiray xoolo dhaqato, isla markaana uu hadda yahay aabe leh lix carruur ah.

VOA Somalia
Halgan.net