Waa sidee caawa xaalada magaalada Garoowe ee xarunta Puntland

Garoowe:-Wararka caawa naga soo gaaraya magaalada Garoowe ee xarunta Puntland ayaa sheegaya in heegan la galiyey ciidamada amaanka Puntland qeybahooda kala duwan waxaana caawa si weyn loo adkeeyey Amaanka  guud ee magaalada Garoowe waxaana magaalada raxanraxan u socda ciidamo ka tirsan Daraaawiishta Puntland kuwaas oo ka amarqaata Taliyaha howl-galka amaanka xiliga doorashada Puntland Jen Saciid Dheere .

Waxaa kale oo ay ciidamada kala duwan ee Puntland ay adkeeyeen amaanka Hotelada ay degan yihiin Issimada  ,Nabadoonada Puntland iyo Musharaxiinta waxaana caawa yar isku socodka magaalada Garoowe iyada oo hadal heynta ugu badan ay tahay ku dhawaaqida guddiga xalinta khilaafaadka iyo ansixinta baarlamaka cusub ee Puntland liiska xubnaha cusub ee golaha baarlamaanka Puntland .

Hotelada Garoowe ayaa galabta ilaa caawa waxaa ka socda kulamo gooni gooni ah oo ay leeyihiin Musharaxiinta u tartamaya madaxtinimada Puntland iyo Issimada waxaana maalinta birito ah la filayaa in Musharaxiinta iyo  Issimada ay ku dhawaaqaan mowqifkooda ku aadan liiska xubnaha cusub ee golaha wakiilada ee ay caawa ku dhawaaqeen guddiga xalinta khilaafaadka iyo ansixinta baarlamaka cusub ee Puntland iyadoo wararka hordhac ah ay sheegaan in musharaxiintu ay aqbalin doonaa Liiska cusub ee Golaha wakiilada ee Puntland.

Waxaa maalinta Birito lagu wadaa in la dhaariyo xubnaha cusub ee Baarlamaanka Puntland si ay u doortaa shir gudoon ka dibna ay doortaan Guddoomiyaha Baarlamaanka Puntland.

Dadweynha ku dhaqan Puntland ayaa ku kala argtiyo duwan liiska xubnaha cusub ee golaha wakiilda Puntland taas oo lala xiriirnayo kala aragti  duwanaanta Issimida Puntland waloow ay dhamaantood ka siman yihiin ilaalinta nabadgalyada Puntland iyo in waxwalba oo khilaafa lagu dhameeyo wada hadal.

M_M Deeq
Halgan.net