Wafdi ka socda QM oo gaaray magaalada Kismaayo ee xarunta gobalka J/hoose

Kismaayo:-Wararka ka imaanaya magaalada Kismaayo ee xarunta gobalka J/hoose ayaa sheegaya in wafdi ay horkacayso Kaaliyaha Xoghayaha Guud ee Qaramada Midoobay u qaabilsan taageeridda dhismaha nabadda, Judy–Cheng Hopkins ay gaareen magaalada Kismaayo waxaana halkaas ku soo dhaweeyey madax ka tirsan Maamulka KMG ee Juba iyo saraakiil ka socta ciidanka AMISOM.

Kaaliyaha Xoghayaha Guud ee Qaramada Midoobay u qaabilsan taageeridda dhismaha nabadda, Judy–Cheng Hopkins ayaa waxaa socdaalkeeda ku weheliyey ku-xigeenka ergayga gaar ah ee Qaramada Midoobay u qaabilsan Soomaaliya Fatiha Serur.

Wafdiga ka socda QM ayaa waxaa uu kulamo kala duwan la qaadan doonaa Madaxweynaha Maamulka Jubba Sheekh Axmed Maxamed Islaan (Axmed Madoobe) waxaana ay ka wada hadli doonaan amaanka gobalada Jubooyinka iyo xoojinta xiriirka hay’adaha Qaramada Midoobay iyo Maamulka Juba iyo sidoo loo horumarin lahaa.

Kaaliyaha Xoghayaha Guud ee Qaramada Midoobay u qaabilsan taageeridda dhismaha nabadda, Judy–Cheng Hopkins iyo ku-xigeenka ergayga gaar ah ee Qaramada Midoobay u qaabilsan Soomaaliya Fatiha Serur, ayaa shalay kulan kula yeeshay madaxda DFS gaar ahaan Raisulwasaaraha DFS Cabdiweli Sheekh magaalada Muqdisho.

Cabdi Yare
Kismaayo