Wasiir ku xigeenka amniga ee DFS oo ka hadlay weerarkii lagu qaaday golaha Shacabka

Muqdisho:-Wararka ugu danbeeyey ee naga soo gaaray magaalada Muqdisho ayaa sheegaya in ciidamada DFS iyo kuwa AMISOM ay dileen 7 ka mid ah kooxda Al-Shabaab ee saaka soo weerartay xarunta golaha Shacabka.

Wasiir ku xigeenka amniga qaranka ee dowladda federaalka ah ee Soomaaliya Ibraahim Yarow Isaaq oo goordhow la hadlay warbaahinta ayaa sheegay in Ciidamada dowladda federaalka ee Soomaaliyaiyo kuwa AMISOM ay xaqiijiyeen amaanka golaha baarlamaanka DFS wuxuuna sheegay in qarax uu ka dhacay afaafka hore ee golaha shacabka ka dibna rasaas ay bilaabatay ayna ciidamada DFS ay fashiliyeen weerarkii ay damacsanaayeen kooxda Al-Shabaab.

Wasiir ku xigeenka amniga qaranka ee dowladda federaalka ah ee Soomaaliya Ibraahim Yarow Isaaq ayaa sheegay  in aysan jirin xildhibaano ku geeriyooday weerarkii sida ay baahiyeen qaar ka mid ah warbaahinta Soomaaliya.

Ilaa haatan Lama garanayo tirada rasmiga ah ee kooxdii soo weerartay golaha baarlamaanka iyo khasaaraha ka dhashay weerarka balse waxaa jira warar hordhac ah oo sheegaya in askar ka tirsan DFS ay ku dhinteen weerarka ayna ku dhaawacmeen laba xildhibaan .

Dhanka kale waxaa jira tiro dad rayid ah oo ku dhaawacmay weerarka ay soo qaadeen kooxda Al-Shabaab kuwaas la geeyey isbitaalada magaalada Muqdisho.

A/Cawale
Halgan.net