Wasiirka Arrimaha Gudaha Jabuuti shir jaraa’id ku qabtay Jabuuti

Jabuuti:-Wasiirka Arrimaha Gudaha ee Jabuuti Xasan Cumar Maxamed oo shir jaraa’id ku qabtay magaalada Jabuuti ayaa goor dhowayd u sheegay saxaafadda in saddex qof ay ku dhinteen qarxayadii xalay ka dhacay Jabuuti.

Waxa uu sheegay in saddexda qof laba ka mid ah ay yihiin dadkii qaraxyda ka dambeeyey oo uu sheegay inay ahaayeen qaraxyo ismiidaamin ah kuwaasi oo kala ah qof rag ah iyo qof haweenay ah.

Waxa uu sheegay in qofka saddexaad ee dhintay uu yahay muwaadin u dhashay dalka Turkiga.

Wasiirku waxa uu intaasi ku daray in 15 qof aya dhaawacmeen kuwaasi oo iskugu jira 7 Faransiis ah, 4 Jarmal ah, 3 u dhalatay dalka Isbayn iyo mid u dhashay Jabuuti.

Madaxweynaha Jabuuti ayaa horranatii bishan joogay magaaladan Washington oo uu kula kulmay madaxweyne Barack Obama.

Jabuuti waxaa saldhigyo ku leh dawladaha Maraykanka, Faransiiska iyo kuwo kale.

VOA Somalia