Buri’ Hamza iyo Mohamed Idris oo ka wadahadlay gargaar bani’aadanimo oo dowladaha Imaaraadka , Sacuudiga iyo Qatar u fidinayaan Soomaaliya.

Mogadishu, May 13, 2014-Wasiiru dowlaha Arrimaha Dibadda iyo Dhiirigelinta Maalgashiga  H.E. Buri’ Mohamed Hamza ayaa maanta ku qaabilay xafiiskiisa Danjire  Mohamed Abdalla Idris oo ah Madaxa Ergada Ururka Jaamacadda Carabta ee Soomaaliya , waxaana ay ka wada hadleen isku dubaridida taageero wadamada carbeed ay siiyaan Soomaaliya si looga gudbo dhibaatooyinka bani’aadanimo oo ay ka mid yihiin cuna-yari, biyo la,aan iyo baahi dawo oo ka jirta gobolada kala duwan ee dalka , si gaar ah magaalooyinka iyo deegaanada  laga xoreeyay kooxda nabad diidka

Danjire  Mohamed Abdalla Idris ayaa waxa uu sheegay in Warbixin uu u diray Xoghayaha guud ee Ururka  Jaamacadda Carabta oo loo qeybiyay wadamada kala duwan ee carabta oo ku aadaneed baaqa Jaamacadda Carabta ee gargaaridda dadka Soomaaliyeed , ay ka soo jawaabeen dowladaha Iskutagga Imaaraad-ka Carabta ,Sacuudiga iyo Qatar , iyadoo dowladda Imaaraad-ka ay bixin doonto gargaar toos ah , halka dowladaha Sacuudiga iyo Qatar ay gargaarka Soomaaliya u soo marsiin donaan hey’adahooda gargaarka qaabilsan.

Wasiiru dowlaha Arrimaha Dibadda iyo Dhiirigelinta Maalgashiga  H.E. Buri’ Mohamed Hamza ayaa ammaan iyo bogaadin ujeediyay kaalinta Ururka Jaamacadda Carabta ee ku aadan Soomaaliya iyo howlaha gargaar ee ay ku deeqayaan Soomaaliya wadamada Imaaraad-ka , Sacuudiga iyo Qatar.

Kulankani ayaa waxaa sidoo kale lagu faaqiday ka mira-dhalinta iyo ka faa’ideysiga  Isku-imaatinka 6-aad ee carabta iyo Shiinaha oo ka furmi doona bisha June Magaalada Beijing ee Caasimadda dalka China oo Wasaaradda Arrimaha Dibadda iyo Dhiirigelinta Maalgeshiga lagu cazuumay kaqeybgalkiisa, iyadoo fiira gaar ah la siinayo xiriirka xoogan ee u dhaxeeya dunida carbeed iyo dowladda China.

Xafiiska Qeybta Warbaahinta iyo Xiriirka Bulshada ee Wasaaradda
Section of Press and Public Relations
Follow us on Twitter and Connect to our Facebook page
Tweets by MOFASomalia
https://www.facebook.com/mofa.somalia